又到七月書展，但對電子書沒太大好感。可能是鍾情於書本的質感，更可能是因為當年電子書的流暢度、吸引度都不甚高，不是慢過龜，就只是搬字過機。但經過數年發展，電子書似乎已到成熟階段，連「執書狂」如我，試用後都有點不能抗拒的感覺，大呼過癮！
記者：韓繼聰
攝影：伍慶泉
Model：Sansu
No.1
多媒體插歌播MV
現時的電子書已經發展到加入短片、聽歌、MV乜都有，與其話佢係書，不如話佢係多媒體程式！如果你係老書迷，可能會話佢不知所謂，但不能否認活用多媒體，能令「書本」的吸引力大增！特別是新一代年輕人，看的全是會郁會互動的畫面，會拿書看的少之又少，多姿多采嘅多媒體電子書一定可以引起佢哋嘅閱讀興趣。
No.2
即場下載唔使抬
每年書展都係書迷掃貨嘅好時機，個個一袋二袋甚至出動行李篋，都係為咗盡情入貨，但係人多書又重，真係咩mood都無晒！不過買電子書就因應科技進步變得更方便，由於現時上網速度快咗，機器嘅效能亦提高咗，小記就即場試過下載成本書，真係幾分鐘搞掂，買得超爽！
No.3
單手操作放大睇
如果你揸住部iPad睇電子書，梗係睇得舒服，但如果好似我咁得部電話仔，就真係隨時睇到眼都盲。要放大咩？又要兩隻手先搞得掂，逐頁揭都幾煩！因為呢個問題，家嘅電子書大多數有埋純文字模式，只要手指一按即刻放大，單手操作都好方便，好簡單！
No.4
分享好書一按易
家潮流興Share，連BB便便暢通都要Share，無理由睇到本好書唔Share出去俾啲朋友仔睇吓嘅！以前要Share好書，可能要親手攞本書俾人睇，家互聯網時代仲使乜咁煩，電子書Apps一早聯繫埋你個facebook、twitter、微博，一按icon，即時Share！得閒Share多幾本書出去，文化氣息都重啲，網友分分鐘以為你係文人雅士！
No.5
成本低圓作家夢
鍾意睇書嘅人唔多唔少都會發過吓作家夢，但係要出書唔係咁易。首先要有耐性，乖乖寫好一大本著作；第二要有錢，因為要出書至少印三千本，幾萬蚊走唔甩。但家唔同喇，電子書毋須印刷費，已經先慳一大筆；再者電子書無篇幅所限，鍾意寫幾多都得。現時市場上更有電子書出版商推出套餐，為未成名的你出書，要圓夢好Easy！
