噚日各大本地主要報章，無不以內地高速列車相撞事故作為頭條，呢宗造成超過200人死傷嘅慘劇，再次喚起外界對內地高鐵安全問題嘅關注。
事實上，原鐵道部部長劉志軍今年初因為涉貪下馬，已經打窒咗內地大力發展高鐵條氣，之後又傳出中央要削減投資規模，避免產能過剩；好衰唔衰啟用唔夠1個月嘅京滬高鐵又唔爭氣，接連出現故障。所以有理由相信，喺香港上市嘅一眾高鐵概念股，例如中國南車（1766）、南車時代（3898）、中鐵建（1186）等，呢排都唔會有運行，戰友們千祈唔好咁衝動撈底，因為弱股只會越弱。
不過，曾經被高鐵概念打殘嘅內地航空股，在此消彼長嘅情況下，反而值得憧憬，根據彭博綜合券商預測，三大內地航空股──東航（670）、南航（1055）同埋國航（753），今年預測市盈率講緊只係9至10倍，絕對有力再飛高啲！
唐牛