李克勤和香港小交響樂團的演唱會前晚在紅館舉行尾場，自爆因壓力而暴瘦的克勤獲好友劉德華撐場。華仔與克勤high爆合唱，克勤形容華仔的地位等同家人，華仔即讚克勤是「最好最好最好最受歡迎男歌手」，又暗寸無綫說：「我係亞洲，不過家連亞洲都冇埋，我係全世界最受歡迎男歌手。」
一連六場的「李克勤．香港小交響樂團演奏廳」前晚在紅館圓滿結束，蔡少芬與丈夫張晉、宣萱與男友、許冠文夫婦、錢國偉等都有捧場。與克勤老友鬼鬼的劉德華原來也低調撐場，他更刻意避開記者混在粉絲堆中，但最終被歌迷踢爆，全場即時起哄，克勤就以家人來形容華仔，並說：「當你演唱會冇錢放煙花，當你同佢競爭最受歡迎男歌手，佢會同你拉票，當你結婚時同你做伴郎，呢啲仲唔係屋企人。」
壓力大瘦10多磅
克勤和華仔在台上high爆合唱《我恨我痴心》，華仔更自爆一直心思思想同小交響樂團合作，但因為「小交」兩個字令他嚇怕，全場觀眾即爆笑。臨離開時，華仔更單腳跪地叫觀眾給「最好最好最好最受歡迎男歌手」的克勤更多掌聲，克勤即謙虛說：「唔敢當，你喺度，冇人敢講最受歡迎嘅嘢。」華仔即抵死回應，同時暗寸無綫說：「我係亞洲，不過家連亞洲都冇埋，我係全世界最受歡迎男歌手。」
今次演唱會克勤坦言壓力甚大，更瘦了10多磅，他在台上說：「我喺酒店瞓，睇自己資料，由93年個唱後，我開咗11個演唱會，證明自己家庭負擔好重，開始叫有啲經驗嘅歌手，今次係咁多騷嚟講壓力最大最緊張，因為係以音樂為主，唔知觀眾會有乜反應，有晚sms畀我太太話壓力大到透唔到氣。」台下觀眾即抵死叫做人工呼吸，克勤又指兒子來欣賞其個唱是一件奇妙的事。
及後克勤在慶功宴自爆體重跌至59公斤，連太太都擔心其健康。克勤笑指兒子第三場曾來欣賞，但當兒子見到台上戴了眼鏡的三弦大師時即大呼「badguy」，更吵着要離開。有指他個唱鬧鬼，克勤則說：「我就唔信，鬼咁好睇呀，冇理由萬幾人得一個人睇到。」
採訪：馬建華
攝影：黃文偉