泰國朋友僑居香港已久，最近大選完畢，特登返去曼谷行一轉，觀察最新情況，行前好樂觀，返到嚟就有啲失望，因為民主黨唔肯認輸，要告上法庭，要求解散贏得大選嘅為泰黨，如果得逞嘅話，泰國紅衫軍好可能上街示威抗議，局勢再度混亂。
黨爭禍國，莫過於此！新加坡方面嘅東南亞事務專家撰文指責民主黨冇政治風度，輸咗想賴死。泰國政治現實如此，教人無奈。左丁山啲泰國同學素來係反他信派，佢地全部投票俾民主黨，佢地話受過高等教育嘅泰國人，絕大部份支持民主黨，鄉下佬先至支持為泰黨。但係呢，鄉下佬人數眾多，曼谷精英係少數，講一人一票，曼谷精英輸梗啦。
曼谷精英討厭他信一派貪污、搞壟斷、官商勾結、逃稅，更鄙視佢細妹仁樂沿用嘩眾取寵政策，大派福利，提升最低工資，提高穀米收購價，開支票話提高新大學畢業生人工。對曼谷人嚟講，呢啲全部係騙人鬼話，如果全部實施，泰國遲早變希臘。但對鄉下農民嚟講，呢類政策直情係上天恩賜之蜜糖，唔嗒糖就有鬼，碰啱民主黨領袖阿披實自細到英國讀易通、入牛津，返到泰國落鄉競選，就渾身不自在，與識得在街頭炒泰國米粉嘅土炮畢業生（清邁大學）冇得比，啲農民選票梗係落晒為泰黨啦。
左丁山啲同學心情失落苦惱，矛盾之極。想當年，佢地冒死上街對抗機關槍坦克，爭取民主選舉，不再任由軍人槍桿子出政權。好嘞，奮鬥經年，有咗真正選舉，連國際觀察員都認為開放公平，但佢地支持嘅政黨就屢戰屢敗，對佢地眼中之「無知鄉愿」選民好唔忿氣。不過民主選舉遊戲規則，就係少數服從多數，冇理由次次輸咗就搞政變（尤其是佢地年青時候極度鄙視嘅軍事政變）嘅啫。曼谷同學心有鬱結，開始懷疑在「民智未開」情況底下，一人一票是否一個好制度。左丁山叫佢低首下氣，睇吓為泰黨搞成點，如果該黨亂嚟，下次選舉人民會唾棄佢，現時最緊要係確立一個和平輪替嘅選舉制度，再搞黃紅衫軍對抗，泰國永無寧日嘅嘞！