名人o靚模爭相喺書展出書，原來李嘉誠其中一個孫女李思穎（Nicole）亦有份，書展星期三開幕當晚仲搞咗個小型簽名會。佢爹哋小超李澤鉅冇現身，由媽咪王儷橋陪伴，母女二人逗留個幾鐘頭，全程十分低調，最矚目係有兩個保鑣傍住。
超人孫女梗係唔係出水着寫真，而係為兒童書《我要回家》畫插畫，呢本書講述小孩誤闖森林，在貓頭鷹幫助下成功回家嘅故事，作者係眼科醫生譚秀雯，Nicole按故事情節畫咗11幅插畫。據書本封底介紹，呢部係Nicole第二部作品，指佢係一個10歲嘅國際學校學生，完全冇提及其家境。作者譚醫生話，佢同王儷橋係好朋友，知道Nicole畫畫有天份，上年籌備出書就搵Nicole合作，佢話Nicole放長假先得閒畫插畫，「冇諗過搵佢嚟做宣傳」，將來有機會會再合作。《我要回家》賣68蚊，收益全部捐畀幼吾幼慈善基金。