筆克遠東（752）息高PE低，兩個字：「抵搞！」筆克主打展覽館承造及相關業務，業界中份屬一哥級數。2011年半年度（4月結），筆克純利8210萬銀，只係增長1%咁大把。但要咁睇，筆克期內再冇好似去年咁，受惠上海世博呢個大型活動，半年純利仲Keep得住，相當唔錯。
再講，集團除咗祖國，近年亦積極開拓巴西、中東、印度等極具潛力嘅市場，加埋本身地位，又係長賺長有格局。上半年度筆克增加派息到每股4仙（2010年3.5仙），集團增加派息，照計下半年度業績應該唔曳。係咁易計數，筆克全年純利增長10%到2.1億銀，PE8.9倍，息率維持5.8厘，吸引到痹。博筆克翻半番到2.30元，預期PE13倍咁大把。
申銀現金牛待發圍
申銀萬國（218）插到落1年低位，最新NAV2.2元，PB落到1.3倍水位，舒服好多。又申銀上年尾揸住嘅現金1.24億銀，銀貸得6200萬銀，係淨現金股，財政冇問題。而中線睇，祖國及香江金融業機遇多的是，加埋申銀嘅中資優勢，肯定有得發圍。Beforethat，趁住港股勁彈，短打博申銀升20%到3.50元，PB1.5倍，唔係太過。
錢雋