謝安琪心入面有一個烏托邦，希望娛樂圈沒有明爭暗鬥，不會玩針對，不會有緋聞，不再有負面新聞，只有音樂，還有快樂，所以她根本不適合這個娛樂圈。05年入行至今，拍拖、結婚、生仔、攞獎、拍戲做女主角，對謝安琪來說是上帝早已預備，不過，幸福不是必然，走紅可能需要代價，被負面新聞搞到焦頭爛額的她今年避走外地半年，開始學會用人造衞星俯視一切，發現原來這個世界，空間可以好大。 撰文：楊潔雯
溫室小花謝安琪（Kay），畢業前有家人淋花灌溉，出道後，上位太快，沒有時間進修社會大學人際關係科，所以不懂人情世故。09年是Kay事業高峯期，於各大樂壇頒獎禮獲獎無數，但同時四面受敵，負面新聞不絕於耳，無論是喜是悲，對她來說，失控的場面令她束手無策，她日前接受訪問時說：「我自細生活圈子好簡單，冇乜經歷過好大壓力嘅時候，入行我遇到已經係我覺得好難處理、好棘手，但其實都唔係啲乜嘢事。」
短短5年，謝安琪由商場表演躍升到紅館開騷，走紅是否要付出代價？她說：「我冇諗到咁沉重，紅與唔紅對我嚟講好次要，我知道誤會我嘅人好多，了解我嘅人好少，最初我以為個scale好細，我都係對準一啲思想接近嘅人溝通，但係家好奇妙地變得好大型，我仲係變咗一個好主流嘅歌手，當中我有掙扎過，我想變番好細。」
老公教路笑看人生
Kay續說：「其實我做嘅嘢似播種，努力做好本份，回報唔係咁緊要，但係好搞笑，我做有message嘅音樂反而有人用原子彈炸你塊田，我邊有諗過係咁，引來好多人唔順眼、攻擊，佢哋係唔留手o架，唔係用BB彈射你兩嘢，係好似有血海深仇咁炸到你最好化灰！佢地係見到你頭髮憎你腳趾，見到你嘅牙憎你耳仔，係可以去到咁樣。」
落得如斯田地，Kay今日竟然可以用幽默搞笑的手法道出，老公張繼聰應記一功，她說：「佢（張繼聰）同我講人生冇風浪點算得上係人生呢！我俾人誤會好大壓力，佢話我冇崩冇損又冇流血，唔需要介懷，呢個係lesson，最緊要係點樣喺呢個過程舒服開心咁樣做自己人生要做嘅嘢，唔好被打垮，仲要多謝考驗你嘅人。」高人點路，謝安琪今後應該謹遵教誨，努力學習做人的道理。
食屎論自嘲小學雞
年初Kay的食屎論，令人瞠目乍舌，作為阿媽，是失禮；作為公眾人物，是無禮，說話要講場合，分層次，在家閒話家常，屎尿屁可以搞笑一番，不過Kay今次用「個仔鍾意食屎，你就畀屎佢食」比喻讀者和媒體之間的關係，用詞不太恰當，她說：「我真係一個唔識說話藝術嘅人，我係小學雞level，講嘢唔叻、唔修飾，係我性格，我係speakmymind嘅人，諗到乜嘢就講，我又唔覺得我承擔唔起，咪硬食囉！」
Kay續說：「我唔係本住一個壞心腸去講，不過，家想改善，我用呢兩年時間參透出一個道理，我咁樣做係唔成立，我要learn一個lesson，原來講嘢唔叻係會瀨嘢！不過我會努力去學，我知道人係唔需要太執着，唔係次次都要好有道理。」
Kay克服困境，多得愛人一直在背後支持和鼓勵：「有乜嘢好得過有個人日日喺屋企搞笑，搞到80歲，見到屋企個個人笑，係最開心，佢好多嘢都係哈嘻呵hea就過咗！個人好豁達，心地超好，好識得開解人，會鼓勵身邊嘅朋友，好有影響力，佢係我心目中嘅領袖。」
放開懷抱克服幻聽
升得快，撞得痛，Kay負面新聞搞到焦頭爛額，更曾一度出現幻聽，是初期精神病患者病徵，因為張繼聰的照顧，Kay才走出陰霾，她說：「我家咪舒服咗，睇開咗，我哋係會好認真咁傾偈。記得我個仔兩歲第一次帶佢去睇戲，點知撞正人哋首映，我哋唔想佢曝光，最後都有本雜誌出咗我哋一家三口張相，當時我離開戲院喺度諗緊呢件事，但係佢（張繼聰）同我講嗰日我哋冇帶相機，20年後嗰張相就可以紀念，有時closeup睇係好大件事，但係如果用人造衞星，會好舒服好順眼，所以好多時我遇到壓力，佢都會有啲智者之言，贈我兩句，我又會舒服好多。」
髮型：EveChiuofP.O.Phairdressing 化妝：AndyLeungofmake360.com
造型：Dee
服裝：Voulezvouz、JessicaRED、LaneCrawford