有理由相信，立法會最近兩年行正桃花運，否則唔會接二連三有喜事，先有曾鈺成、涂謹申第二春開花結果，噚日八方再接獲喜訊，醫學界立法會議員梁家騮今年9月中秋結婚，新娘子係同佢拍住上多年嘅Cannas關天燕，恭喜恭喜。
曾被議員當佢係同志
因投票立場難捉摸而被同僚戲稱「怪醫」嘅梁家騮醫生，忽然傳出婚訊令好多人驚奇，八方甚至聽過有議員以為佢係同志！Cannas同八方講，梁家騮幾個月前求婚，如何求婚不便透露，「佢年紀大又怕羞，好含蓄嘅，哈哈哈」。Cannas以前做記者，近年開公關公司做老闆，曾幫梁家騮競選；佢話兩人認識10年，但直至大半年前才「撻」着，「冇話拍拖幾個月唔結得婚嘅，識咗咁多年，覺得大家好多嘢都好啱、好夾，哈哈哈」。
不過據八方收到嘅風，兩人緊密關係已有好一段日子，過去幾年幾乎晚晚撐枱腳食飯，去年又一齊去日本滑雪，仲一杯雪糕兩份食！喺準新娘掩蓋不了嘅喜悅當中，八方追問佢：「有冇餡？」「絕對冇，我都好想生，哈哈哈。」八方叫佢放心，因為梁家騮間診所隔籬就係何永超間勝利生育所，「係呀，真係好方便，哈哈哈」。
據講新人在追月日擺酒，喺洲際擺最少40圍，Cannas話佢哋親戚朋友多，呢個只係基本盤，又話擇日9月結婚，因為「呢兩個月最得閒」，否則10月立法會復會後就忙到氣咳，明年又係選舉年，根本冇可能搞結婚，「度蜜月都冇時間，要押後到年底，哈哈哈」。
挑戰醫管局一舉成名
梁家騮係中大醫學院首屆畢業生，經典作係出錢出力與醫管局打官司八年追回超時補水；為咗挑戰巨人，佢更賣滙豐股票做「彈藥」，最終勝訴，經此一役奠定江湖地位，08年初次參選即晉身立法會。一直喺公立醫院工作嘅梁家騮，去年8月自立門戶喺中環開診所，今年結婚，明年連任，後年做乜？應該plan咗啦。
mailto:[email protected]