咩叫獨攬大權？皇家馬德里教練摩連奴（右二）就係人辦嘞！上周五呢支西甲班霸就宣佈，摩連奴將兼任埋足球部體育總經理。之前皇馬足球部體育總經理係巴爾達諾，因為同摩連奴不和，5月已經離職；同之前華丹奴辭任總監，搵老友鬼鬼嘅施丹出任唔同，摩佬今次係直接兼任埋總經理一職，即係話由球員買賣、練習、排陣等，事無大小都係「寸王」話事。
其實皇馬呢幾季成績俾巴塞隆拿食住，或多或少同成日換教練，同埋教練與管理層不和有關，今次摩佬大權在握，係好係壞都仲屬未知數，但肯定今次由佢孭晒飛，唔似得以前咁，教練同總監之間互相卸膊，總監買啲人番嚟，又唔啱教練心水，好似加高、柏度李安等，就一直都得唔到摩佬重用，仲開到口要佢哋醒水自己走人。不過，會長佩雷斯都只係講求利益，摩佬上季只贏西班牙盃，未必滿足佩雷斯胃口，今季有咩閃失，幾大權一樣可以被炒魷。