被圍內人視為鑽石王老五嘅梁家騮，終於名草有主。立法會內，堪稱超級剩男、剩女嘅，應該係民建聯陳克勤同公民黨陳淑莊。
嚴格而言，陳克勤唔係剩男，因為已有穩定女友，不過從政多年，可能尚要在政途衝刺，因此未有婚期。佢私下同老友講，他日結婚嘅話，未必會大搞，因為怕麻煩，不過都唔會裸婚嘅，總之適可而止，一定會公告天下咁話。
至於陳淑莊，之前有個親密男友，可惜從政後公而忘私，一星期忙足七日，根本完全冇時間拍拖，結果和平分手，好黯然。時不我與，八方聽聞陳淑莊痛定思痛，立下宏願，假如明年再參選，又假如可以連任，就會痛改前非，全力為自己姻緣幸福打拼，笑言要成為首個攞產假嘅議員，名留青史。產假前四後六，咁要唔要搵人替補嘅呢？