咪以為只有港女先會高呼我要嫁個有錢人，拜金主義，似乎喺祖國更加盛極！近排北京開咗一間婦女德育學校，齋聽個名，正氣過正氣，實情，佢係一間教女兒家釣金龜婿嘅學校！
釣龜課程有咩學？唔計基本化妝談吐，其他做一個有錢佬背後嘅女人嘅知識都有得學，包括拍賣舉牌技巧（適用於任何拍賣活動）、點樣打理身價百幾萬嘅馬士提夫狗、着真正馬球裝束，同埋學習數口精，不過，係講緊7位數字嗰隻！課程嘅重點所在，就係學點樣精準咁睇清一個男人嘅性格同地位……即係學唔好揀錯空心老倌以免浪費彈藥囉！
學費方面，同學嘅嘢一樣咁「上等」，30粒鐘嘅課程，盛惠3000蚊美金，折番港紙大概係780蚊一粒鐘，雖然「揦脷」，但都收到2800個女學員，無他嘅，因為學校仲做埋媒人嗰part銷售服務！幾千蚊釣到隻令自己一世無憂嘅金龜，濕濕碎喇！