美人開舖係咪一定唔愁無客？未必！IFC國金二期金融才俊報料，話靚模AmandaS喺IFC開嘅甜品麪包小店PetiteAmanda（照譯中文即係嬌小嘅Amanda）終於開張大吉做生意﹗雖然Amanda喺佢哋嘅大多數人眼中，都係好欣賞嘅女神，但班才俊落過去兩次之後，不約而同咁話，都係幫襯番隔籬星巴克！
侍應唔生性 齋企唔招呼
才俊話喎，作為正常嘅雄性哺乳類動物，知道美麗女神喺自己office樓下開舖，借頭借路落去買杯咖啡食件cake就梗o架啦，如果有嘢要傾，直頭攞正牌去睇靚女喇﹗才俊都唔例外，上星期同幾個兄弟落去「買嘢食」。當佢哋響門口睇吓有咩正嘢（佢話係指食物同咖啡喎！），企喺佢哋隔籬嘅3個女侍應（或者叫shopassistant），完全無問過佢哋半句想要咩，零交流到無朋友，而女神店主呢，就喺後欄忙。才俊們同女神幾個侍應「對峙」咗五六分鐘左右兼無嘢睇，決定行番過隔籬幫襯，而後尾畀多次機會，情況都係咁，所以，佢哋決定唔會再「翻啅」女神。
才俊話明唔幫襯，班女強人又唔會走去撐個Model，今時今日咁嘅服務態度，嬌小嘅Amanda點喺IFC生存呢？
李華華
mailto:[email protected]