王家衛套《一代宗師》早幾日公佈咗一條宣傳片，片中梁朝偉演嘅葉問喺雨中擊退十個強敵，但最吸引仲係梁朝偉嗰番說話，重新為功夫定位，佢話「功夫是一橫一豎，錯的倒下，對的站着。」但呢番話係用配音嘅。
好多網友喺唔同渠道睇咗段片都讚不絕口，睇過嘅人數已經超過十萬，佢哋睇完仲即刻喺微博留言，而網友都有一個共同意見，特別係廣東地區嘅群眾，就係好希望可以聽番偉仔把原聲而唔係配音。連電影《打擂台》嘅導演鄭思傑都喺微博話覺得用番粵語同埋偉仔把聲，霸氣會強好多。
原聲配音更傳神
有見及此偉仔就特別為呢條宣傳片配過一條粵語聲，內容仲比國語版更直接同有霸氣，佢話「功夫係一橫一直，錯嘅瞓低囉，企得番喺度嗰個先係啱晒，係咪咁話呀？」直接得嚟氣勢逼人。電影公司方面就叫香港觀眾放心，遲啲香港上映時一定會用番偉仔把原聲喎。