焦媛和黃宇詩都是35歲，兩個中女，也是宅女，不鍾意逛街，最鍾意躲在屋企攤唞，她們對現代愛情都有戒心，黃宇詩怕在不知情下成為第三者，焦媛則提醒已婚女性，小心專吼有婦之夫的肉食女；因為她倆有這些共同特質，所以最新的舞台劇《中女解毒》由二人擔綱演出，算是最佳拍檔。
舞台劇《中女解毒》下月公演，由焦媛和黃宇詩兩個中女演出，入型入格。黃宇詩覺得中女並無不妥，而且感覺不錯，她說：「拍拖、結婚都要隨緣，我之前都拍過，不過唔記得幾耐之前，一拖都幾年，唔啱咪分開囉！之後都試過想過同人一齊，但係家有好多人都好混亂，可能無端端做咗第三者都唔知！如果一段感情咁多人分，我情願一個人，做埋宅女都唔錯！」
煲劇過足癮
焦媛也是中女，但是她一早泊了個大碼頭，相信好快會上岸，有拖友，不代表生活多姿多采，她仍然是宅女一名，她說：「係呀！我都唔鍾意出街，最鍾意喺屋企睇電視，外國追兇連續劇就最好睇，睇吓點樣殺人，點樣查案，好鬼過癮。」
不過，焦媛在這齣新舞台劇入面，可能要做一個小三，因為時下好多肉食女，專喜歡戀上有婦之夫，焦媛說：「係，家係有好多，我個朋友生埋小朋友，都逼住要離婚，所以大家都要小心。」焦媛未結婚，怕不怕男友高志森戀上其他人，她說：「我好幸運一早遇到個啱嘅人，我哋都好了解對方，結婚都要講時間配合，大家都咁忙，真係要度下先。」採訪：楊潔雯
攝影：陳順禎