新任美國公開賽冠軍嘅北愛爾蘭高球新星麥艾萊，最近英國公開賽表現走樣竟然賴個天，查實佢打得差嘅原因係移情別戀先真。麥艾萊早前同女友史雲妮復合，仲唔畀對方睇英國公開賽，以免令自己分心；但日前突然喺英國公開賽前，自爆話同史雲妮已經分手，仲表現得鬼咁傷心。不過轉個頭，佢就俾人踢爆貪新忘舊，搭上丹麥網球甜心禾絲妮雅琪。據了解，麥艾萊月初喺傑素高對希耶場拳賽認識禾琪（上圖），之後火速撻着，仲俾人影到喺倫敦當街激咀（下圖），唔怪得英國公開賽咁屎波啦！不過，禾琪出名係仔都啱，高又高過麥艾萊，難怪唔少網友睇死呢段長短腳之戀好快散。