山東「首富」杜雙華老婆宋雅紅「被離婚」案，最近成為大陸熱門話題，更被稱為「國內第一離婚案」。你冇睇錯，係「被」離婚，即係「被動」嘅意思。
話說，呢對夫妻分居多年，舊年宋雅紅想提出離婚時，先至發現河北法院早喺01年已經頒發咗離婚判決書。既然女方想離婚嘅意願已經一早達成，其實冇乜好講。問題係，涉及幾百億財產點分。
富豪否認避分身家
內地傳媒質疑從事鋼鐵業嘅杜雙華，係咪同河北法院勾結做假，避過同「前妻」分身家。喺傳媒窮追猛打下，杜雙華前日出嚟反駁，用萬言書數臭前妻。佢話，之前已經畀咗幾千萬生活費，但對方貪得無厭，仲話宋雅紅一早已經知離婚，堅持十年前河北法院判決有效。果真清官難審家庭事！