繼「小學雞」粗口鬧爆父親後，最近網上熱傳一則「地產界恥辱」嘅短片，猶如「小學雞」地產版，當然，粗口係更勝「小學雞」好多籌喇！
查實成條5分09秒長嘅片基本上冇乜內容，只係一般平常嘅勞資糾紛。事件中主角之一嘅馬鞍山代理行港滙物業老闆吳謙成，被指拖欠前僱員薪金，俾人上門追糧，兩個更當街炒大鑊爆粗互片，當然，條片嘅內容係唔出得街喇！而呢段片今個月4日上載至Youtube，到噚日為止，點擊率超過8700次。
華華都了解過成件事，事緣吳謙成兩年前與W先生創立港滙，但之後因合作問題反目，最後搞到拆夥，部份經紀跟埋W一齊走，仲喺同區開咗間行打對台，吳謙成企硬話自己唔係無良僱主，絕冇拖欠任何人糧，當時拆夥，已跟足勞工法例，向受影響嘅員工作出賠償，足足賠超過50萬元，仲俾埋出糧紀錄華華睇，誰是誰非，只有佢地先知！