美國農業部發咗一個報告，指由去年九月一日至今年八月三十一日嘅年度，美國嘅乙醇工業生產商（ethanolproducers）會消耗五十億五千萬浦式耳（bushels）嘅玉米，供提煉乙醇之用，一個浦式耳係美國農業嘅重量/容量計算單位，上網一查，就搵到每一浦式耳嘅玉米相當五十六磅玉米或二十五點四公斤，又或等於一點六磅/七百毫升玉米油，用嚟提煉乙醇嘅話，可以得到二點五八加侖或十一點三七公升，左丁山架七人車裝滿油要有五十公升，計番轉頭就係相等於四點四浦式耳。
消耗五十億五千萬浦式耳，用上述比例計算，可得574.185億公升乙醇，夠11.4837億架汽車裝滿油，好似好多噃，但美國現今有幾多架車？二○○四年時有一個估計，係二億四千三百萬架，依家當佢有二億五千萬架啦，全美國一年提煉出嚟嘅乙醇，只夠美國全部汽車裝滿油行個幾兩個月。
但對糧食嚟講，美國乙醇工業耗用嘅玉米多過全美玉米收成額嘅百分之四十，實際上就係與飼料業及人民搶食，在非洲遇上旱災，飢民遍野之際，美國駕車人士用乙醇做燃料，叫做好環保，用可更新能源（renewableenergy），唔知個心安唔安樂呢？倘若以小麥計算，一個蒲式耳小麥可以轉化成九十件長方形麪包，五十億五千萬浦式耳可以製成多少塊麪包，夠餵飽多少人？他日千祈唔好發明自小麥提煉乙醇嘅方法呀。
玉米價錢一年來上升咗九成，若然話與提煉乙醇無關，好難令人相信。美國乙醇工業主要以環保、再生能源之名，得到聯邦政府稅務優惠而發展出來，一旦冇咗稅務優惠，其實冇乜競爭力，實際上係環保政治產品。用乙醇的確可以減少排放，但在減排與增加糧食之間，救濟飢民之間，我地會選邊樣？
美國未來可以從加拿大大量輸入石油，因加拿大擁有大量油沙（oilsands）吖嘛，但一旦遇上環保政治問題，就唔可以講經濟意識咯。