應屆英聯盃冠軍伯明翰，新一季要喺英冠重新上路，力圖重返英超，繼換完領隊，球隊亦大換血後，據報周一球會又有驚人創舉，就係班主楊家誠嗰仔Ryan，做埋球會董事，如果成事，年僅18歲嘅Ryan將成為英國最年輕球會管理層。
新球季要喺英冠角逐嘅伯明翰，休季期間都幾多人事變動，領隊由麥利殊，換上前紐卡素領隊曉頓，另外中堅羅渣莊臣、中場施巴斯坦拿臣等都離隊；補入馬龍京治、基斯布基、史提芬卡達維等新血（見附表）。英國報章《太陽報》同《每日郵報》周一報道，球會連管理層都有變動，總監韋士文（MichaelWiseman）離開董事局，執行主席彭彼德（PeterPannu）同楊家誠嗰仔Ryan將會入局，不過仍然要等聯賽會嘅體格及人格評審，先可以落實。
官司纏身方便遙控
傳媒對Ryan認識唔多，除咗一般相信因為楊家誠鍾意傑斯（RyanGiggs），所以起阿仔個名叫Ryan外，Ryan一路都喺英國接受教育，住喺爸爸倫敦嘅居所，亦不時入場睇伯明翰比賽。英國傳媒相信，因為楊家誠受官司纏身，Ryan入局就方便楊生喺香港都可以遙控到球會。
不過Ryan年紀輕輕，新一季都幾大責任，尤其球隊原有條「脊骨」，都面臨被拆散嘅危機；好似常規中堅羅渣莊臣，已經落實以700萬鎊（約8,800萬港元）加盟狼隊；巴利費格遜、施巴斯坦拿臣都係上季中場重心，亦都已經離隊。另外，史篤城睇中咗伯明翰嘅前鋒謝路美，同中堅史葛丹恩，如果佢哋兩個都走埋，伯明翰新球季都幾大問題。睇番伯明翰嘅新兵，史提芬卡達維、馬龍京治算係英超失意軍人，只有中場基斯布基有啲朝氣。我求大俠都好關心事件，噚日不斷嘗試打楊生手機求證，不過一直轉駁去留言信箱，搵唔到楊生親口回應。
