郭羨妮因拍劇同內地武指朱少杰撻着，雖然拍拖唔耐，但已決定結婚。呢半年長駐內地嘅郭羨妮，噚日到澳門為代言手信博物館做剪綵嘉賓，同場仲有蔡瀾、應屆港姐陳庭欣、張秀文同莊思明。之前一度傳郭羨妮有BB，但見佢着住條紅色吊帶裙肚平平，狀態甚弗，四圍啲嘉賓又猛咁祝福佢，佢都一一受落。
婚禮謝絕圈中人
原定年尾結婚，不過郭羨妮話會延遲：「因為要拍兩部劇，其中一套係同佢（未婚夫）拍，拍完先結婚，賺多啲錢先結。」會唔會遲到明年中？郭羨妮又話唔使咁耐，佢好開心咁講：「一拍完就結，大家放心，我一定結婚。」有傳佢哋會去小島行禮，郭羨妮話呢個係同未婚夫嘅希望，佢表示：「因為想係私人婚禮，只諗住請親戚同舊同學，唔會請圈中人，收到圈中人嘅祝福已經好足夠。」
婚後會唔會移居內地？郭羨妮話唔會，因為同無綫仲有約，要兩邊走。之前傳有BB，郭羨妮話時間可證明一切。至於造人就順其自然，目前最緊要係約設計師好友何國鉦為佢嘅婚紗再試身，希望有最完美嘅效果。
