第三條機場跑道正在做緊諮詢，但公開討論漸趨沉寂。咁大嘅經濟基建問題都唔見引起熱烈討論嘅！左丁山就唔覺得奇怪噃，香港嘅沉默大多數認真係多數，逢有諮詢，出嚟評論，發表文章者，數嚟數去都係得幾班人，一早可以預料到，而且大家嘅言論都可以預測埋噃，一講到基建，大家幾乎可以打賭，公民黨黎廣德一定反對，理大熊永達一定反對，環保團體一定反對；工程師學會一定贊成，專業團體一定贊成，商會一定贊成，……次次都係咁，劇本必定如此，諮詢完畢後，贊成派與反對派相持不下，互不相讓，永不妥協，最後搬到上立法會，又係泛民反對，功能團體贊成，僵局依然。其實有諮詢、冇諮詢，結果都係一樣，但唔做諮詢，就係政治不正確，有違程序公義咁講，故此諮詢一定有，當做一場喃嘸阿彌陀法事可也。
環保團體反對興建第三條跑道，理由耳熟能詳，唔駛再寫。呢日碰到一位老友記，係志願/救災團體人士，突然間諗起一條問題，於是問佢：「新加坡基建一日千里，填海填到要向所有東南亞國家買沙，究竟新加坡啲環保團體有冇反對過，還是一致贊成？」朋友望咗左丁山一眼，細細聲話：「新加坡與香港唔同嘅噃，你知唔知呀？莫講激進環保組織，照我所知，即使係樂施會，喺新加坡都冇分支呀！」吓，左丁山真係孤陋寡聞，樂施會好似比較少講環保，多講救濟嘅噃，冇乜威脅性啫，新加坡居然冇樂施會？
如果講激進，有啲人連基本禮貌都故意唔理。一位斯文女士Ｃ參加咗一個大型第三條跑道講壇，輪到台下發言，一位綠色團體頭頭竟然唔係講跑道，而係用咗不少佢嘅時間大罵台上嘅經濟學教授，人身攻擊，令全場矚目，Ｃ女士嘆一聲：「呢啲人以為自己講綠色，就係道德化身，他人一定係衰鬼，實情係走火入魔。」入魔容易伏魔難，一旦以為「真理在我」，自己係救世主，往往覺得世人庸碌，自己懷才不遇，搞到成世人唔快樂。