Angelababy（楊穎）近年工作量大增，這半年多已接拍了十個廣告，豬籠入水，之前她接李宇春棒拍洗頭水廣告，在人造水池內濕足幾個鐘，結果凍到震，我見猶憐。Baby已拍過衣、食和行，她坦言希望拍「住」的廣告，賺錢之餘可乘機睇樓實現業主夢。
近年忙於拍戲的Angelababy，依然分身做其他工作，在這半年多已接拍十個廣告，早已躋身小富婆行列，好像即將推出的洗頭水廣告，是接內地女歌手李宇春棒，早於年初拍攝，操刀的外籍導演曾跟不少巨星合作，拍攝當日天氣寒冷，但Baby卻要在錄影廠內搭成的水池中濕身演出。
停機休息取暖
拍攝當日，Baby穿上碎花吊帶裙，雖然在室內但仍然相當寒冷，鏡頭前Baby不停擰頭令一頭秀髮飄起，轉眼間已不知擰了多少次，但Baby完全沒有任何怨言。另外一個鏡頭Baby整個人要浸在水池中，只有頭部在水面，工作人員事前已在池水加入暖管，但由於水池面積算大，結果暖管未能真的讓整個水池變暖，Baby慘要浸在凍水中。
拍了一陣，工作人員見Baby默不作聲，雙眼通紅兼全身抖震，才驚覺她太凍，馬上停機讓她上水休息，再送上毛巾和薑茶取暖。休息幾分鐘Baby回復狀態，再下水拍攝，工作人員因此笑言：「後生真係好，點捱都得。」
閒時四處睇樓
短短半年Baby已接了多個廣告，她坦言：「衣、食同行嘅廣告我都拍過，下次希望可以拍有關住嘅廣告。其實賺咗嘅錢我都有用嚟投資，希望有機會買樓，等家人住得好啲，閒時我都有睇樓。」她謂若可拍樓盤廣告，既有錢賺又可睇樓，一舉兩得。
此外，昨日書展開鑼，雖然今年Baby未有出寫真，但其公司替她推出復刻版寫真，電影公司也推出她的電影《全球熱戀》多款海報，全由夏永康操刀拍攝。
撰文：SnowYip