日頭索罟灣食海鮮，入黑模達灣食夜景，由香港仔出發，短短廿零分鐘船程，風景已經同市區截然不同。嘆地中海美食，Hea喫甘甜嘅鬼佬鹹魚，你會發覺眼前嘅模達灣，更有度假Feel。
記者：徐影龍
攝影：伍慶泉
Model：Betrys@GME
喪玩水上玩意
若由中心點索罟灣向東行，差不多需時兩粒鐘先到達模達灣，最啱行山人士舒展筋骨，假日兼天氣好嘅日子，特別多一家大細入嚟癲番日，事關模達灣同樣有靚海景同沙灘，而且多出一堆水上玩意。
「西沙水上活動中心」提供獨木舟、巨轆水上單車等水上玩意，儘管拍攝當日天氣時晴時雨，但百厭星Betrys一樣唔執輸，瓣瓣都話要試玩，好彩有專人教路，連佢咁笨手笨腳都舞得掂，相信小朋友一樣玩得安全兼盡興。
（27928307/南丫島模達灣，所有設施一口價：非會員$135，會員$118，玩兩小時）
無敵海景送地中海菜
入夜人迹稀少，獨佔沙灘靚景嘅「星浪餐廳」格局稱唔上豪華，但亮起霓虹招牌同一盞盞藍燈，就將模達灣變成一幅臨海夜景圖。隨住日變夜，Betrys亦由動變靜，拎住杯獨門鮮檸雜飲，悠閒地望海扮沉思，明Chok樣，要我幫佢影番張詩情畫意相，擺上fb咁話喎。
餐廳主打地中海菜，老闆Raymond推介先飲番杯Lemonade開開胃，加入香葉同秘製醃檸檬，一杯特飲兼具幾種香味，清凉可口，令連我呢個怕甜怕酸嘅大男人，都忍唔住Order番杯。頭盤先上銀魚柳拼番茄片沙律，有啲似迷你凱撒沙律，菜同番茄當然新鮮，最特別係法國銀魚柳，俗稱「鬼佬鹹魚」，入口超甘甜帶少少鹹，令沙律不再平平無奇。我係海鮮狂，最欣賞大蜆伴白酒汁，蜆肉每日由香港仔新鮮運到，每粒大過五蚊銀，厚肉夠鮮味，用白酒及乾葱煮，比用日式清酒煮多一分回味酒香。清淡一輪，到超級濃味嘅非洲雞上場，例牌半隻雞將缽仔塞得滿一滿，未捧上枱，離遠已經聞到獨特香味，Raymond話：「雞混合多款香料醃製，入焗爐前加椰汁同薯條，缽邊放水欖，可以中和一下雞肉濃味。」
（29828186/南丫島模達灣7號）