王祖藍下個月19、20號喺灣仔伊館演出「王祖藍ShowOffShow咪咁扮嘢演嘢會」，有環節會講佢同女友李亞男傳福音而拍拖嘅經過，李亞男仲會上台做嘉賓，到時佢哋會模仿周星馳《家有囍事》中巴黎鐵塔反轉再反轉咀嘴動作。
噚日呢對情侶去元朗綵排，祖藍倒吊自己同李亞男試位，試多幾次後，祖藍差啲腦充血，要求落地唞啖氣。李亞男見男友咁辛苦，不知幾咁緊張，其間仲咿嘩鬼叫，搞到祖藍分晒心，猛叫亞男唔好嗌。
女友起初唔肯
祖藍話想做最經典嘅kiss，於是向女友要求，亞男初時話要諗，因為想將最好嘅留到第日先做。「第日」嘅意思應該係指結婚啦！祖藍覺得家做激啲，咀完再砌個十字架甫士，佢話到時做到所有動作會好開心，李亞男跟男友口水尾話：「我都好開心。」點知祖藍踢爆話：「家就話開心，初時搵你又唔肯。」
