李克勤和小交響樂團的演唱會前晚在紅館舉行，台上他盡騷歌藝，又播出和老婆盧淑儀跟大細仔Ryan及Rex的親子照大晒溫情。克勤還唱別人的歌諷刺社會熱門話題，不避嫌辣到小甜甜龔如心和陳振聰及低胸紫荊俠。
久未在紅館開騷的李克勤，前晚跟小交響樂團合作舉行演唱會，好友陳百祥和黃杏秀及無綫新老闆「殼王」陳國強及太太到場欣賞。克勤先後換上七套歌衫上場，當中有粉紅及橙色等鮮艷造型，但他的造型當然不及歌藝吸引，他除了跟三位男高音鬥唱外，更把一曲《舊歡如夢》由尾唱回開頭，一字不漏。
唱盡社會怪事
克勤還演唱別人的歌來諷刺熱門社會話題，當他唱鄭秀文的《薩拉熱窩的羅密歐與茱麗葉》，大銀幕播出小甜甜龔如心和陳振聰的親密合照，觀眾即大叫拍掌，唱陳百強《幾分鐘的約會》則播學生打野戰的片段，而唱陳奕迅的《大開眼界》時指向近日熱爆的低胸紫荊俠，還笑指吳君如、白韻琴及周秀娜可能是其人。另外，克勤唱陳慧琳的《最佳位置》還播出三位下屆特首熱門人選唐英年、梁振英及范徐麗泰，唱畢後克勤說：「大家覺得OK嗎？其實有啲片仲勁，不過cut咗，因怕得罪人。」
「要做稱職老竇」
已有兩子的克勤又播出大細仔Ryan和Rex的親子照，其中有他和囝囝咀嘴的鏡頭，最後更有和老婆盧淑儀一家四口的家庭照，他說：「呢兩、三年我投資多咗時間喺小朋友身上，父母係要陪仔女，每日要同佢哋傾偈、冲凉同踢波，開心嘅時候係要一起，病就要帶佢哋睇醫生。因為四大公司問題，曝光率係少咗，事業係重要，但更要珍惜家人，我要做稱職老竇。」克勤重申不是退休，依然為事業努力。
尾聲時克勤請來容祖兒做嘉賓合唱《刻不容緩》，兩人表示已有7年未有合作，克勤說：「搵個騷大家一起做，有乜台可以做呢？」祖兒則笑說：「但你唔嚟得嗰個台呢！」事後問到克勤是否擔心得罪人？他說：「唔關我事，我嘅顧問曾志豪研究過係冇問題，又冇唔好嘅嘢。」
採訪：王連連 攝影：葉君海