【《蘋果》專訪】一代慈善伶王新馬師曾（鄧永祥）離世14年，其首本名曲《萬惡淫為首》至今仍繞樑三日，為讓祥哥作品繼續流芳百世，祥嫂洪金梅遂與子女着手為祥哥推出一系列發燒紀念碟。日前，祥嫂在其首度曝光的二萬多呎豪宅內，與女兒小艾整理祥哥的煙槍及舊相簿等珍貴遺物，母女二人憶起祥哥生前點滴，不無感慨。
現年65歲的祥嫂洪金梅在祥哥97年離世後，獨自搬往陽明山莊居住，至四年前遷入元朗二萬多呎豪宅居住。儘管祥嫂一搬再搬，但祥哥生前的珍貴遺物，過去14年來祥嫂仍好好保存。前日，祥嫂與女兒鄧小艾在豪宅內整理祥哥的珍藏，順道揀選舊照為祥哥推出發燒紀念碟，祥嫂並邀請本報記者參觀其豪宅。
祥哥燒槍騎電單車
在祥嫂豪宅的每個角落，幾乎滿載着祥嫂對祥哥的珍貴回憶，包括91年與祥哥拍攝的巨型結婚照、二人昔日安樂窩的家具，甚至祥哥生前珍藏的煙槍等。祥嫂將祥哥的煙槍放在飯廳的飾櫃內，旁邊還擺放了一盞煙燈，據祥嫂透露，煙燈是祥哥朋友從法國選購送給祥哥，跟煙槍一樣是祥哥生前至愛的收藏，故祥哥離開後，祥嫂亦將物件好好擺放。至於屋內金碧輝煌的家具，亦滿載祥嫂的甜蜜回憶。祥嫂說：「啲傢俬係我哋結婚時朋友送，到家差不多20年。」小艾也說：「媽咪會親自抹o架，keep得仲好好。」
小艾跟祥嫂翻閱祥哥的舊相簿，見到祥哥威武地騎電單車、射槍、跟兆尊、小艾和兆榮等子女一起玩樂的家庭合照，更是百般滋味在心頭。祥嫂說：「祥哥好鍾意揸電單車。」在旁的小艾亦忍不住插嘴說：「佢揸到40、50歲時，見佢年紀大，唔再畀佢揸，嗰陣時我都買咗部電單車，老竇又想攞嚟揸，但我唔畀，怕佢整親。」
為祥哥放棄做明星
祥嫂表示，祥哥生前除喜愛粵劇和騎電單車外，還興趣多多，包括燒槍、打網球和桌球等，就連昔日做大戲的戲服，也是祥哥親自畫草圖設計，還有昔日推出的唱片封套，祥哥也有參與設計，祥嫂說：「祥哥好有設計天份，60年代佢出嗰啲唱片封面，好多都係祥哥自己設計。我哋拍拖嗰陣，佢成日帶我去大球場睇波，但入到場之後啲球迷唔係睇波，係睇祥哥，佢真係好鍾意運動，乜都玩！」祥哥如此多才多藝，難怪令祥嫂如此着迷。
原來，祥嫂為了祥哥，放棄了做明星的機會，她笑說：「我當年後生嗰陣，都有好多人想搵我拍戲，但祥哥唔畀，佢話會好易失去我喎！」至於早年祥嫂梳的髮髻，也是為祥哥而梳，她說：「祥哥要我梳髻，因為我哋年紀相距遠，我梳髻之後會成熟啲，同佢配襯啲，唔會好似兩父女咁。」
力保地位捨棄子女
當年祥嫂為助祥哥發展事業，放棄了照顧子女的時間，祥嫂坦言：「顧得老公嚟一定疏忽兒女，我情願捨棄兒女，都唔情願第二個服侍祥哥，有第五任祥嫂接上去，所以我一定要霸住呢個位，啲仔女當時入世未深，先會唔體諒我。」另外，祥嫂還透露永祥大廈在60年代原名叫祥雲大廈，她說：「祥哥覺得暈一日都死，仲要『長暈』，所以想改做紅祥大廈，但戲行冇人用自己個名起大廈，所以最後叫永祥大廈。」
為讓祥哥作品繼續流芳百世，祥嫂與小艾數年前已打算為祥哥推出紀念作品，祥嫂說：「呢十幾年市面好多假嘢，音質好差，所以今次我哋同丘亞葵合作，重新整理過啲唱片，到時我會通知海關，親自帶隊去巡視捉啲翻版。」
採訪：溫敏芝
攝影：葉君海