特區政府慷納稅人之慨，向公務員大幅度加薪，高級公務員加幅超過七巴仙，公僕當然人人高興。本來人地加薪，我地冇得加咁多，幾十年都係如此，冇乜好恨，但政府好精嘅，一早與眾多接受政府撥款嘅公共機構講明（例如大學），機構員工薪酬與公務員脫鈎，自行辦理，意思即係話，呢類機構可以自定薪酬標準，追隨市場，比較靈活啲。
講就係咁講，在公共機構打工之人，慣咗公僕文化，即使薪酬與公務員脫鈎後，心理上仍然覺得自己係公家僱員，做乜公僕加薪，我地唔加？日前返大學見到一位即將退休嘅員工，佢話希望退休之前，可以好似公僕咁，加六至七巴仙人工，並且追溯至今年四月一日開始，佢就可以收多差不多半個月人工先至退休。左丁山話：「想就係咁想啦，但係一早已經薪酬脫鈎咯喎，實有得加嘅咩？」員工話：「喂，我地個個希望跟政府加薪o架，減薪嗰陣時我地咪一樣減，話之佢脫咗鈎啦。此乃所有同事嘅合理期望！」既已脫鈎，何來合理？後來與一位轉工跳槽嘅大學管理層人員傾呢個問題，佢話：「員工就話有期望，負責管理嘅副校長以上人員就苦惱不堪。今年嘅大學撥款係三年前已經訂下嘅，新一個三年度撥款在2012年度開始，三年前決定嘅撥款，邊會估到今年公僕大加薪呀，大學要加薪嘅話，要從舊撥款挖一大嚿錢過嚟以應付新增薪酬，你估話一聲咁易咩。而且加薪之後，總薪酬永遠增加，明年撥款如果唔反映到呢筆錢，大學咪長期缺資？點冚數？」
唔，簡單啲講，八間大學總撥款嘅銀碼，由教育局與政府決定，交俾UGC（教資會）分配，如果政府唔為大學員工加薪七巴仙而增加總撥款嘅話，UGC點會有符？大學要做「責任僱主」，只能向累積儲備埋手，但唔係間間大學有咁多儲備嘅啫，所以一講到跟隨公僕加薪，每間大學都有本難唸的經。大學嘅錢唔係天跌落嚟嘅，靠學費就永遠入不敷支，一定靠政府撥款為主，以私人捐款為輔，大學校長好難自命清高，不向牛津韓美頓學習。此道理則非一啲自鳴清高嘅人士所願意明白嘅嘞。