華華早排同大家講過，百幾位曾經北上到國家行政學院讀國情研習班嘅同學仔，組成咗「國家行政學院（香港）工商專業同學會」。呢個同學會噚日正式搞咗個活動，搵中銀國際副執行總裁謝湧海喺午宴上講人民幣國際化，順便畀個機會大家聚頭。
呢個同學會猛人特別多，包括唔多出席公開活動嘅李嘉誠基金會董事洪小蓮（圖）。原來佢係研習班第4屆學員，上一星期課，舊年畢業，係同學會理事之一。
睇睇洪小蓮張卡片，公職唔少，包括科大、理大顧問委員會委員、嶺大校董，又係地產代理監管局成員，同房協執委會委員。噚日出席午宴前，啱啱開完房協會會議。可惜，佢保持一貫禮貌低調作風，問到李嘉誠基金會最近動向，只係笑笑口，就搵藉口行開。