暫時仲係阿仙奴隊長嘅法比加斯（右），眼見領隊雲格（左）唔畀佢離隊返母會巴塞隆拿，就展開「跳船行動」！據報，雲格帶隊完成亞洲之旅返咗英國，法比仔將正式面對面同雲格傾前途問題，希望「教授」畀佢加盟巴塞，而唔想正式入紙申請轉會，令到雙方關係決裂！不過另一方面，亦有指雲格好有信心法比仔會留隊，仲話相信佢會喺周六對科隆場友賽，替兵工廠上陣㖭！