去國際級拍賣行佳士得bid嘢，感覺上只係有錢人玩意，但原來都唔係太高不可攀，特別係競投紅酒，最低3,000蚊都有交易。香港佳士得助理副總裁、名酒部專家李少鵬話，只要事前做足功課，搵啱心水就唔怕舉錯手。
好多人覺得紅酒俾內地人炒貴晒，李少鵬話事實未必如此，皆因睇番成交紀錄，來自遠東嘅客戶約佔45%左右，而部份競投者只會一支一支買，紅酒嘅年份，係客人決定係咪買入嘅主要因素。「未必一定要靚年份，例如有啲人會買自己出生、結婚年份嘅酒。」
拍賣行有門路搵好貨
香港買紅酒多門路，點解要去拍賣會？李少鵬話，如果想買罕有又保存得好嘅名酒，去拍賣場有好處，因拍賣行同大酒莊素有合作，「例如想買支1937年嘅陳年紅酒，市面上搵到嘅大部份都未必飲得，我哋就有辦法搵到一啲仲飲得嘅返嚟」。
好似近月舉行咗場ChateauLatour拍賣會，李少鵬就有份飛到法國酒莊，仔細檢查每樽酒。當時拍賣嘅Latour紅酒年份橫跨兩個世紀，隨手拎起一支都係古董，酒莊揀咗12支唔同年份嘅酒畀佢哋試。咁咪嘆咗好多靚酒？李少鵬笑笑口講：「我老細先有得試。」
講番bid紅酒，李少鵬教路話，拍賣前要詳細閱讀拍賣圖錄，再比較市面零售價，睇啱心水，就要訂下可接受競投價。提早入場都好重要，因為紅酒拍賣流程好快，每小時可成交60至200件拍品。
除咗親身到場舉牌，亦可以透過電話、網上或書面競投。網上競投紅酒嘅比例較其他拍賣品高，可能因為紅酒有較多後生仔買家。現場競投係最傳統方式，緊張刺激。電話競投好處係令你可以遠離嘈雜環境，冷靜諗清楚先落價。至於書面競投，只要填張表，寫明最高可接受價錢就得。好處係自己鍾意出幾多就幾多，有個上限，唔受其他買家影響。
mailto:[email protected]