【本報訊】籽樂行動三位核心成員，都是初出茅廬的80後少女。幾個女孩經常深宵出動，走進社會陰暗處，有愛無懼。Carrie說：「有次去天光墟，有個阿婆擺地攤，我哋買咗兩盒豆漿畀佢，佢唔要，仲話曾蔭權拎畀佢都唔會要。我哋惟有走喇，點知有幾個男人跟住嚟，係咁話佢哋想要豆漿，佢哋有紋身o架。我哋越行越快，好彩佢哋冇再跟住嚟。」
FunFun理財顧問向甜夢出發
22歲的FunFun畢業於嶺南大學社會科學系，第一份工是保險公司理財顧問。她出身低收入家庭，住大埔公屋。父親最近去世，母親以前做清潔工，現已退休。媽媽並不支持FunFun的善舉，「開頭都幾孤單，阿媽都唔支持我，佢話我好儍，自己都唔夠使，仲去幫人？」
她有個很甜的夢，「開糖水舖，全港十八區都要開一間，每日撥出一、兩小時，專門免費招呼有需要嘅人。我唔淨只要派糖水，仲要有需要嘅人可以有個地方坐喺度食，感覺係唔同嘅，我覺得自己已經同夢想一步一步拉近」。
Carrie辦雜誌鼓勵青年追夢
畢業不足一年，Carrie便自行創業，辦了一本名叫《DreamMag》的雜誌，專訪一些有夢想有使命的人和企業，希望藉此感染年輕人，鼓勵他們積極做人，教人追夢。22歲的她畢業於科技大學會計系，曾在會計師行短暫任職，但很快便轉行做社企公關。她說：「做會計俾人嘅感覺好穩定，其實呢個世界冇嘢有絕對保證，最緊要係你想行邊條路。好多會計師每日都做到好夜，可能搵好多錢，但係咁唔係我想揀嘅路。」
Mary衝出溫室接觸真世界
核心成員還有23歲的伍欣兒（Mary），她去年在香港大學英文系畢業，現時任職秘書。出身中產家庭的她，第一次派糖水時接觸到一對拾荒的公公婆婆，婆婆坐在路邊，按着肚子嘰哩咕嚕不知在說甚麼。原來她在說客家話，意思是很餓，沒有錢。
Mary說：「可能係第一次，衝擊好大，不斷問自己，點解呢個社會，仲有啲人咁貧苦？」她指父母思想保守，過份保護，每次她出動派糖水，都不會跟父母說，因為他們總會不斷打電話催促她回家。