民主黨陳家偉俾記者影到出入鳳樓，搞到身敗名裂，辭職唔做總幹事兼要着草。選舉年爆出呢啲醜聞，建制派趁機攻擊泛民私德敗壞好正常，細莊唔係道德批判者，對好多男士因個人喜好或工作應酬出入風月場所，以平常心看待。
聽一個在iBank工作朋友講，個別從政嘅上市公司老闆、大狀同律師都有出嚟玩，其中，朋友對一位被稱為「滾女達人」嘅政客印象特別深刻。
另類TeamBuilding
朋友數年前幫「滾女達人」間公司做刁，由於廠房喺東莞，上去睇廠做DueDiligence係例牌動作，日頭睇廠，晚黑主人家招呼成team人去到一個叫「天地無限」嘅大場。入到場內，該上市公司老闆以「尊貴」身份獲熱情招待；而在VIP包廂，已經有超過20名女「員工」等候貴賓，「滾女達人」當仁不讓，即刻攬住兩個相熟嘅「員工」詳細「訪談」。
酒過三巡，朋友以好奇口脗問「滾女達人」，佢話晒係公眾人物，出嚟玩得咁張揚，擔唔擔心出事？對方好坦白，話喺香港一定唔敢玩，但返大陸則冇問題。首先，以佢嘅生意同政治身份返大陸，老婆一定唔會懷疑；第二，如果喺內地玩咁容易出事，邊個肯做建制派呢？
「滾女達人」越講越興奮，連佢代表業界上北京交流，帶隊去香港人常去嘅富華大廈KTV嘅事都講埋出嚟，仲話每年十．一，好多建制派都會上京參加國慶活動，成班人更會約埋做另類TeamBuilding！朋友唔識政治，恍然大悟話，怪唔得建制派咁團結啦。
逢周一刊出