曼聯新舊7號同皇馬新舊靚仔基斯坦奴朗拿度（C朗）同碧咸，前日喺場季前熱身賽作正面交鋒。賽前碧咸佔盡風頭，但前日場波，C朗就帶領皇家馬德里4:1贏碧咸隊洛杉磯銀河，贏番一個回合。不過，碧咸嫂維多莉亞之後突然出招，喺twitter首次公開碧咸同細女夏芭（HarperSeven）嘅合照，令碧咸用慈父樣撼贏C朗嘅Chok樣！唔知C朗睇到之後，會唔會有樣學樣，公開佢同囝囝嘅合照呢？
C朗贏波《馬卡報》抽水
碧咸啱啱生女，加上佢係C朗喺曼聯同皇馬嘅前輩，所以喺銀河對皇馬嘅賽前記招，佢搶晒C朗鏡，C朗就算換咗髮型都冇人知。不過，皇馬實力始終遠比銀河強，結果喺上周六場友賽輕鬆贏4:1，C朗仲入世界波㖭。
至於以隊長身份帶領銀河嘅碧咸，表現就乏善足陳，仲喺61分鐘因大腿有傷而被換走；唔使問，呢個回合梗係由C朗勝出，仲要係大勝嗰隻。C朗賽後好得戚咁話：「我哋贏咗，咁至係最重要；我哋要繼續加緊練習，迎接即將展開嘅新球季。」
碧咸嘅銀河隊友當路雲亦大讚C朗：「C朗係世上其中一個最勁嘅球員，而佢亦用行動證明咗。」西班牙《馬卡報》亦出嚟抽水，喺報道C朗幫皇馬揚威美國嘅同時，亦大字報道美斯阻止唔到阿根廷喺美洲盃8強俾烏拉圭踢出局，仲加插美斯一張死狗相！
碧咸嫂post抱女相
碧咸賽前威威，賽後頭耷耷，俾表現好佢十倍嘅C朗搶晒風頭；我求大俠以為佢輸硬之際，點知一張相就令佢贏番C朗。賽後冇幾耐，碧咸嫂維多莉亞喺自己個twitter度post咗碧咸抱住細囡夏芭嘅黑白相，相中嘅碧咸同夏芭面貼面，嗰副慈父樣梗係大勝C朗嘅Chok樣啦！正所謂「輸人唔輸陣」，如果我求大俠係C朗，唔使問，一定貼自己同囝囝嘅相出嚟，慈父樣幾時都係贏硬Chok樣o架啦！