被封筍盤稱號的陳豪近期成為廣告紅人，以Shell代言人身份飛到馬來西亞，為參加亞洲區Shell一公升挑戰賽的香港慳油達人打氣及傳受慳油心得。陳豪代步愛驅係揸了多年的舊款Prado，自命慳家王的他話唔捨得嘥錢換車，至於慳油心得就抱住一個宗旨：「心平氣和係慳油必然良方。」呢啲咪筍盤囉！
記者/攝影：許維雅
鳴謝：ShellHK
好脾氣自然慳得多
一年一度的Shell「環保汽車馬拉松」於馬來西亞再次舉行，香港有份參戰亞洲區一公升挑戰賽，四位慳油達人由陳豪領軍出戰。參賽者須以1公升汽油環繞雪邦國際賽道鬥行得遠，上車前更需要1分鐘內講出10個慳油秘訣，否則要用5個大西瓜加磅！
雖然香港隊最後以15.630km/L的成績奪得第四名，但陳豪相信今次比賽經驗對四位達人終身受用：「比賽時你會盡量嘗試唔踩迫力及以高波行車，由經驗所學到的慳油技巧慢慢變成習慣，對日後揸車有好大幫助，不過最重要都係駕駛心態，香港人太急無耐性，想快自然嘥油，揸車盡量要心平氣和，慳到油又安全，兩者永遠相輔相成。」知易難行，面對死不肯讓的小巴佬的士佬，有時真係好難唔火，陳豪尷尬大笑：「哈哈哈，我明！不過10架唔讓，第11架總會讓你啩！」無時無刻所表現出的風度都冧死女，想做筍盤的第一步咪就係好脾氣囉！
傳授慳油5大秘訣
作為慳油大使，陳豪自問他的慳家本色勝任有餘，笑笑口話：「車好貴呀！我揸緊部Prado已經好多年。」唔做大花筒，相信就係筍盤第二秘笈。雖則身家豐厚依然慳住荷包，但自言都有留意新車，「我鍾意BentleyContinentalGT，車身嘅流線設計好靚，性能又勁。」
陳豪似乎都係愛辣車之人，問到會否鍾意鍊車鬥車，盡責代言人笑住答：「我係慳油大使，話自己鍾意啲咁嘥油嘅玩意好似唔係幾好！」記者回應了一句：「Shell都有贊助F1賽事！」佢頓時像個大細路興奮承認：「都鍾意o架！有時喺街俾人撩鬥車，我都會同佢玩陣啦。返到澳洲都會鍾意揸車周圍去，路闊車少仲好飛，試過由布里斯本落黃金海岸，用咗25分鐘！」嘩！路程大大話都有70幾公里，似乎時速過150km/h先可以咁快喎。不過紀錄良好從未試過碰撞的他，強調平日揸車都以安全為主，還逐漸開始習慣慳油駕駛態度。
古靈精怪慳油車 啟發未來
比賽的另一環節，由來自世界各地的學生設計慳油車，今年亞洲區之戰有13個國家95隊代表決鬥，學生們的前衞作品十分值得欣賞！對於環保車的發展，陳豪認為越多越好：「慳油就好似減肥，家減肥毋須食好難食嘅嘢，不論電車定混能車，讓車主多一個慳油選擇，環保車亦逐步可以變得好靚好型。比賽中見到學生嘅創意就係最好啟發。」今年慳油車設計比賽由泰國隊奪得冠軍成大贏家。
陳豪傳授慳油秘訣
1.多保持胎氣充足。
2.保持均速，多用高波，盡量少用迫力。
3.避免開窗擾亂氣流影響風阻。
4.定期檢查汽車零件。
5.執走雜物避免汽車負重太多。
一公升挑戰賽賽果
冠軍：泰國隊15.952km/L
亞軍：新加坡15.856km/L
季軍：馬來西亞15.749km/L