暑假港產青春劇《熱浪球愛戰》明Sell陽光與海灘，加埋美女如雲齊齊瞓身打波，的確睇到人熱血沸騰，不過睇番劇照，娜姐平日的驕人身材好似暫時收起，明讓半球，其實現實世界嘅沙排一樣美女如雲！
記者：王震遠（部份相片由安樂影片提供）
正版胸 有大字
今個夏天，娜姐帶埋班小師妹齊齊瞓身打沙排，焦點除咗睇佢哋出色嘅球技，當然亦會留意一下美指同服裝設計；《熱》中人人服裝各有千秋，娜姐穿起運動衫後，忽然玩起變幻球，收起「事業線」話要專心打波喎！傅穎就穿起大碼背心，將大部份比堅尼位蓋過，明顯收埋唔益街坊；講最引起熱浪，非警鐘胸嘅JessicaC.莫屬，全程比堅尼上陣，事業線完美展現！
其實沙排比賽，對服裝都有規定。首先，球員必須穿着短褲或泳裝，如果比賽規則沒有刻意規範，就可以穿着緊身上衣或背心，而隊員必定要穿同一式樣同顏色的服裝，上衣須要有號碼1和2號，更要繡在胸前位置。不過，《熱》中比賽屬私人競賽，所以唔好理咁多，一於專注睇場好波！
熱．戰衣逐格睇！
古仔一字記之曰——戰！一場收地小風波，令一班波友無得再去貝浪灣打沙灘排球，最後決定用沙灘排球公開賽決定貝浪灣生死！
香港代表：江卓儀
被稱香港最漂亮女運動員之一，年紀輕輕已代表香港出戰多次，自小五開始打排球，後來與「沙排雙妹嘜」的另一人——謝穎紅，雙雙轉會打沙排；後更一齊到nowTV體育平台客串講波，係人氣度極高嘅香港運動員。
日本代表：淺尾美和
日本沙排界最具人氣女球員，身高1.72米，在日本有沙灘仙女之稱，同時又做模特兒，仲試過演出電視劇，紅到沙排都變副業。
中國代表：薛晨
中國沙排界最紅人物，仲有中國一姐之稱號！
剛代表中國出戰沙排大滿貫，連同拍檔張希擊敗巴西組合，並贏得賽事中的銅牌。
日本代表：菅山熏
有睇開日本女排一定識得呢位6號仔！在日本公認係球壇靚女，仲有白之妖精的外號。自09年開始由室內排球員轉職為沙灘排球員，並以倫敦奧運會為目標。
美國代表：KerriWalsh
華殊曾經在04及08奧運贏得女子沙排冠軍，其組合更被稱為最佳沙灘排球隊。
除咗打波叻之外，在美國極受歡迎，拍過多個廣告，更參與過美劇《CSI》。
