【本報訊】高調鋪路參選特首的行政會議召集人梁振英日前被特首曾蔭權暗批「抽水」，一向與梁振英不咬弦的全國人大常委范徐麗泰隔岸觀火，昨日笑稱事件與她無關，並反駁指特首候選人毋須應梁要求拿出政綱來比拼，「你鍾意講乜政綱，你咪講囉」。她又強調，市民眼睛雪亮，不會受到某政治人物「講多兩句」影響，若有人不理解市民想法，「我諗都怕係摺埋嘅時間喇」。
記者：許偉賢
身兼立法會前主席的范徐麗泰，與曾任臨時立法會議員的梁振英，將應邀出席立法會今晚舉行的惜別宴；若曾任立法局議員的政務司司長唐英年也現身，三位疑似特首候選人將在特首選戰前難得聚首一堂。
聚會前夕，聲稱正在考慮是否參選的范太再向梁振英發炮。她昨天出席公開場合時，被問到曾蔭權諷刺梁振英「抽水」，即笑笑口回應指事件與她無關：「我點知佢講邊個啫，好似唔係好關我事。」她表示，自己雖非公職人員，但身為全國人大常委，會小心發言。
「講咗要想辦法做到」
范太又指「抽水論」是口舌之爭，不欲回應，卻不忘「提醒」梁振英：「做人要有啲責任心，如果講咗出嚟，都要想辦法做到為止。」
當被問到梁振英要求一眾疑似特首候選人交代政綱時，有備而來的范太隨即反擊，指現階段毋須提出政綱，「家都未曾正正式式參選，只係大家熱身嘅時候；至於我呢，仲未到熱身㖭，因為我都講得好清楚啦，我都仲未知道自己有冇信心去參加，仲係諗緊，所以根本唔會講乜嘢政綱」。
去馬疑為掩護唐英年
范太隨後更不留情面寸爆梁振英：「你鍾意講咩政綱，你咪講囉，市民梗會睇住o架，香港人真係好聰明o架，千祈唔好低估香港市民。香港人係唔會因為某人講咗啲乜說話，講多兩句、講少兩句，就特別覺得佢好。」她更指出：「我諗香港市民想要乜嘢，好清楚o架喇：如果參政人士到今日都未知道香港市民要啲乜嘢，我諗都怕係摺埋嘅時間喇。」暗諷梁振英不知市民要一個「講得出做得到」的特首。
政界一直盛傳，范太有意去馬，只為「掩護」唐英年順利入場參選特首。有政界中人說，范太批評梁振英的言論，印證傳言並非空穴來風。