隔牆有耳:港台導播話別立會大樓 - 李八方

隔牆有耳:港台導播話別立會大樓 - 李八方

立法會「搬屋」在即,梁耀忠「臭罌出臭草」、黃毓民掟蕉、唐唐吊吊fing呢啲場面能成為經典,全賴負責現場直播嘅一班香港電台編導同攝記。
立法會嘅前身立法局,喺85年進駐呢個中環中心地帶,當時港台台長張敏儀認為應增加議會透明度,向港督尤德建議畀港台直播。就係咁,港台喺兩邊公眾席各設一台攝錄機,86年3月19日首次直播周三大會。

喺立法會電視室做咗10幾年、去年退休嘅港台前編導盧寶華話,90年代嘅議會好鬼長氣,有次做完嘢返到屋企已凌晨4點,眼瞓到爆,唔小心跌親撞崩牙。同樣工作咗10幾年嘅資深編導程倩芸就話去廁所係最麻煩,因為立法會走廊太神聖,只可以畀尊貴嘅議員同官員行,佢去廁所要由電視室跑落街,走去另一個公眾入口再跑返上廁所,咁花時間,個個都唔敢飲太多水。

程倩芸(左)同盧寶華(中)向立法會saygoodbye。
黃冠華攝