再度懷孕嘅徐淑敏（Suki）已有咗近八個月，聽聞今次都係生女，佢噚日佢去咗九龍灣為一個商場嘅兒童活動做嘉賓。雖然仲有一個星期就懷孕滿八個月，但噚日見Suki嘅身形依然苗條，手腳冇肥冇水腫，仲弗過好多港女，Suki話懷孕前體重90磅，家重118磅，對佢嚟講已經好重。
懷孕對Suki嘅生活冇大影響，貪靚嘅佢噚日仲着高踭鞋做嘉賓，佢同小朋友玩遊戲時又盡顯母愛，幫小朋友換衫玩角色扮演。Suki話下個月會去外地旅行，一於玩到盡，佢話：「攞咗醫生紙可以飛多半個月，老公鍾意去旅行。」
老公影大肚相
原來Suki都鍾意上網買衫，佢話：「買咗好多靚泳衣，可以收身後影輯靚相，預計生完三個月可以影。我問老公有冇好介紹，佢話一定要搵女攝影師。之前老公有影啲淨係見肚嘅相，但係自己收藏。」Suki話老公上次有陪入產房，今次都會，而且要老公做足準備，Suki解釋話：「因為我係二女，二女永遠都比大女少好多嘢，我想樣樣家姐有，妹妹都有。」