【模範生】很多時模特兒都被誤解冇腦、貪慕虛榮的行業，不過模界也有卧虎藏龍。今年26歲的曾咏（Winnie）是少數擁有港大碩士學位的模特兒，是名副其實的模範生。前年參加模特兒比賽入行，讀微生物學的Winnie，由冰冷實驗室走到T台，今個月她將推出處女著作《beautyLIVE》分享專業的瘦身方法。
港大2009年碩士畢業曾咏（Winnie）是模界的模範生，身高181cm，屬行騷的好材料，畢業後參加StyleModelHunt的模特兒大賽入行，以高學歷和標準的模特兒身材大熱勝出，當時她更被傳媒稱為翻版樂基兒，獲得Style模特兒公司一紙合約，做熊黛林和Angelababy師妹。
父母專業人士
擁有碩士銜頭的Winnie，在港大攻讀微生物學，由實驗室轉戰模界，入行兩年學識了待人處事的寶貴經驗，她日前接受訪問時說：「當年參加模特兒大賽，家人都十分支持，屋企都好民主，媽咪係醫生，爸爸係工程師，參加比賽豐富咗我人生經驗，喺台上亦建立更多自信心。」
Winnie畢業於廣州中山大學生物系，之後來港攻讀港大微生物學系碩士課程，是一名尖子。廣州出生的她讀書時已經被編排入讀資優班，她謙虛地說：「我都係掹車邊，不過我讀書時算係勤力學生，03年入大學選科時正值爆發沙士，所以當時選修Bio-Technology，希望將來可以研究新藥幫助人。」
提高自信EQ
智慧與美貌並重的Winnie，入行模特兒已兩年，問她入行做模特兒後有甚麼得着？她說：「其實入行做模特兒後，增加咗我自信心，有唔少人對模特兒行業有誤解，以為只係冇腦、貪慕虛榮，賺快錢嘅職業，其實做model要對自己嘅管理能力好高，而且casting時會有機會畀客戶拒絕，EQ都要高。」
喜歡讀書的Winnie，去年抽時間修讀了有關營養學的證書課程，在偶然的情況下開始有出書的念頭，她說：「今個月我將會出一本關於健康《beautyLIVE》新書，主要講健康瘦身同美容，綜合美容專家、醫生、營養師同模特兒各方意見。我從來冇諗過出書，不過今年4月我同朋友食飯，大家都係傾開減肥話題，席間有一位朋友係出版商，問我有冇興趣寫書，嗰時開始先有出書念頭，因為一直以來好多人都對減肥有錯誤觀念。」
減肥強化肌肉
Winnie續說：「我見過唔少模特兒以唔健康嘅方法減肥，以為節食可以減肥，不過唔可以長期節食，一食番正常份量體重就反彈得仲勁，又傷身，減肥唔好只係針對磅數，而係肌肉脂肪比例，要健康減肥一係做帶氧運動至少20分鐘，或者跟減肥餐單，最好喺營養師指導下進行。公司好多模特兒都成日問我健康減肥方法，出書係想同大家分享學到嘅知識。」
近年一踏入夏天，便成為o靚模出性感真寫的黃金檔期，每逢書展都會波濤洶湧、賣身材、鬥事業線，Winnie的新作也將在後日舉行的書展推出，她自言對銷量沒壓力：「我嘅書同寫真完全兩回事，今次係我人生第一次出書，有小小緊張，畢竟我都係得廿幾歲。」
採訪：JessicaNgan
攝影：DickyChan
服裝、場地提供：I.T（京士頓街）
曾咏Profile
英文名：WinnieZeng
年齡：26歲
身高：181cm
體重：56kg
三圍：33、24、36
學歷：
2009年香港大學微生物學碩士畢業、曾代表港大到芬蘭學術交流
入行：
2009年StyleModelHunt模特兒大賽冠軍
曾參與工作：
古巨基MV女主角、日本百貨公司Piago平面廣告、示範Ferragamo、Dior、Chopard等時裝及珠寶騷
「女人要有頭腦」
碩士畢業的曾咏現時全職投入模特兒工作，問她可會有天返回實驗室做研究？她說：「家未有計劃，做model可以趁後生做，到50、60歲先返實驗室做研究都得，讀書學到嘅知識受用一世，而且視野會更闊，做人冇咁易迷失。」
Winnie最欣賞的模特兒是琦琦，她說：「佢形象好，又有自己嘅家庭，係女性典範。女人最重要有頭腦，係日積月累嘅沉澱，青春係最大本錢，但有時效性，將來都係靠自己修為。」