中國網絡（383）嚟緊8月9日舉行EGM，表決出售亞太資源（1104）股權，係時候。聯合系嘅ALLIEDOVERSEA（593）5月宣佈，計劃買入中國網絡揸住嘅亞太資源27.65%股權，作價13.3億銀。若果呢壇製作落實，中國網絡變現嘅現金，係遠高過集團本身市值8.3億銀。即係話，出售每股變現值，係高過集團現價。而隨着亞太資源權益出售，中國網絡亦可以book到兩億銀利潤，NAV除咗可以提升到3.92元，現價（1.50元）折讓進一步拉到61.7%，2011年度（12月底止）張成績表，亦肯定靚仔。再講，有龐大現金回籠，對中國網絡係咪有特別派送，又多一份憧憬。呢轉冷灶煲一煲，博中國網絡升30%到1.95元，到時，集團折讓仍高達50%。
橙天嘉禾價殘可吼
橙天嘉禾（1132）現價0.355元，又係另一家股價跌到同金融海嘯價差無幾嘅股份。而橙天呢個低殘價，相對每股NAV0.5元，亦有28%折讓，電影媒體企業，有折讓嘅，認真少有。又呢期所見，主席伍克波都有出手增持，買入成本價0.32元，同現價差無幾。呢轉短打，博橙天升20%到0.43元，都仲未上到NAV個水位。
錢雋