夏日炎炎又係郊遊影相嘅好季節！辛苦約到靚女同遊，無理由又去啲人去我去嘅地方。無新意，又多人，想浪漫吓都唔得！今日我哋就請到《西貢攝影秘點》嘅攝影師，特選五大攝影秘點，等各位影友影得開心又創新！
記者：韓繼聰
攝影：楊錦文
Model：Isis@InterplayWorkshop
部份相片由《西攝》提供
No.1：白沙洲 勁似馬爾代夫
白沙洲呢個名，其實係因為兩個小島中間有一條細長嘅白色小沙洲而嚟。白沙洲唔大，但主打影相位都有幾個。喺簡陋小碼頭上岸，行兩步就到咗有拱樹嘅小空地，中間仲有個小鞦韆，茫茫樹影，點點陽光，必影！之後見到嘅小木橋，對住藍天碧海，真係有啲馬爾代夫feelo架！沿小山路上山，登上白沙洲之巔，唔高，但清楚影晒成個白色小沙洲，靚！
Tips：
1. 小山路雜草叢生，着短裙短褲要小心！
2. 小山上風景雖然靚，但有不少山墳，影時影，唔好騷擾到人呀！
No.2：北丫 入破屋攝古舊
北丫係位於糧船灣嘅古老村落，因為好多人都已經搬走咗，留低唔少古老村屋，有啲外牆仲長滿樹藤，古雅之餘好有神秘感！想探險的話，仲可以試吓走入破屋，會發現唔少舊木門、醬缸、石磨等，鍾情糜爛古舊感覺嘅影友，呢度啱晒你！
Tips：
1.舊屋內有唔少蚊蟲，蚊怕水唔少得！
2. 舊屋光線較弱，大光圈鏡頭幫到你！
3. 行15-20分鐘就可以到東丫，可以嘆新鮮海膽！
No.3：西壩 萬宜水庫另一面
相對於東壩嘅巨型錨石，西壩真係低調得多！但唔好以為西壩無嘢睇，先喺船上影張相先，靚人配上背後泥紅色大壩，有氣勢！從副壩登岸，睇到高聳嘅主壩，同廣闊平靜嘅水面。未夠？上到主壩仲可以見到小湖、石亭、萬宜水庫，真係好好景！
Tips：
除咗水路，從陸路一樣可以嚟到西壩，喺西貢碼頭搭的士就得！
No.4：鹽田梓 瞄準歐陸教堂
鹽田梓其實已經無鹽田，但唔代表佢無嘢好影。想影歐陸風情，可以去小教堂！想影舊嘢，可以去荒廢咗嘅女童軍營地！想影生態，仲可以去北面嘅大片紅樹林！加埋廢置咗魚塘，島仔細細，但大把嘢影！
Tips：
島上有士多，有嘢飲有嘢食，客家茶粿可以一試！
No.5：東龍島 看海聽浪影水柱
嚟東龍島，主打影兩樣嘢：地貌同古蹟。島上有唔少海蝕洞，其中「噴水岩」就係島上嘅必影位！每當有海浪衝過嚟，就會噴出十幾廿呎嘅水柱！好震撼！此外，島上仲有清朝炮台、東晉石刻和導航燈。有氣有力嘅話仲可以上埋南堂山，從另一角度欣賞東龍島美景！
Tips：
用減光鏡或偏光鏡，減少over嘅情況，有利拍低細緻海浪。
出海Tips：
玩得富貴當然可以Book艘靚遊艇出海影餐飽！但想玩得經濟，喺西貢搵街渡出海亦得！有啲街渡有固定航線，但亦可以自己包船，出發前同船家傾好想去嘅地點同價錢，就可以開心出發喇！
《西貢攝影秘點》攝影師
