華叔回憶錄《大江東去》面世,唔少傳媒都好關心,特別係好想知道書入面有關華叔係共青團嘅史實,原始資料究竟從何而來?所以噚日記者會上,好多記者都追問共青團一事,但唔知點解,負責為記者會搞新書發佈嘅公關公司,咁鍾意阻頭阻勢,阻住記者跟進呢個問題。
當記者圍住司徒強扑咪,問佢有關華叔加入共青團嘅事時,司徒強明明都開緊口回應,點知一路企喺司徒強旁邊嘅女公關就係咁插嘴,猛話時間夠喇,阻礙記者問嘢。輪到記者向出版商扑咪,問出版社有冇聽過有關華叔加入共青團嘅錄音時,嗰位女公關今次更加出手唔出口,強行拉走被訪者。
喂!咁趕時間,你就咪阻住記者問嘢啦!最終辣㷫在場記者,有傳媒更當眾訓斥該女公關咪妨礙新聞自由。