近排雨潤（1068）成為港交所（388）網頁上市公司公告一欄嘅常客，無他，一場民企風暴，搞到雨潤嘅市值，3個禮拜累積冇咗成百億銀，管理層自然要做番啲嘢補救。
雨潤先就傳媒嘅報道逐點反駁，包括重申產品絕對安全、釐清公司同主席嘅業務等；之後再自爆上半年生意同核心盈利都有顯著增長，以增加公司透明度；喺最近幾個交易日，仲主動公佈主席增持嘅消息，連SDI都費事等，雖然講緊只係兩億幾銀，但絕對起到穩定軍心嘅作用。而雨潤呢一連串嘅攻勢，亦都令股價由低位反彈超過一成。
話雖如此，唐牛未有因為咁而去撈雨潤，始終企業管治能力同股價表現唔一定成正比，但雨潤能夠快狠準地回應市場嘅質疑，再連環出招為股價給力，危機應變能力之高，絕對係以曾蔭權為首嘅特區政府嘅學習榜樣囉！
唐牛