就算領隊杜格利殊沒有親自領軍，但8萬名fans盡情吶喊，將吉隆坡的國家大球場變成晏菲路，令利物浦反客為主，上周六與馬來西亞明星隊合演「入球騷」；紅軍最後大勝6:3，亞洲之旅兩連勝，首次擔正的查理阿當在上半場主射12碼破網，加盟第二仗即「開齋」！
在廣州一役只後備上陣45分鐘，查理阿當的表現已獲杜帥讚賞，今次更「升呢」擔任正選；這位25歲中場憑速度多次壓贏大馬守將，從左路帶球殺入禁區，為主隊製造不少麻煩。
26分鐘，安祖卡路爾在禁區被對方踢跌，球證直指12碼，前者特別將這份「見面禮」送給查理阿當，後者主射入網，球證卻指有球員過早衝入禁區，需要重射，結果亦順利命中；這名紅軍中場開齋後，即獲全場觀眾報以熱烈掌聲。
球迷放煙花聲勢勝阿仙奴
攻勢寥寥可數的大馬，在完半場前4分鐘製造驚喜，隊長拉謙在25碼外罰球射過人牆，直入死角，追成平手完半場。下半場紅軍將11名正選全部換走，經過一輪「熱身」，終在67分鐘再次領先；恩素亞左路底線傳中，雖然軟弱無力，但大馬守將走漏在遠柱的法國前鋒尼高治，輕鬆掃入。他與麥斯洛迪古斯其後於69和76分鐘入波，將比數拉開到4:1。
最後10分鐘，大馬首席射手沙利在3分鐘內連入兩球，其中追成3:4的一球有越位之嫌，但足以使全場狂歡，更有身穿紅軍波衫的球迷「轉軚」支持主隊。幸紅軍未有令球迷失望，補時階段，麥斯洛迪古斯接應古積特妙傳頂成5:3；而快將31歲生日的古積特鳴笛前一刻抽射掛網，即為紅軍「埋齋」大勝6:3。
在8萬名觀眾中，有部份人完場後於看台兩邊不顧危險，大放煙花和高唱利物浦會歌，整體氣氛比早前阿仙奴到來更勝一籌。
查理阿當感謝隊友造就
查理阿當賽後說：「非常感謝隊友，是他們提出12碼由我操刀。球季漫長，這只是一個好開始，最重要是保持佳態。」利物浦稍後會轉到新加坡訪問，然後返英迎接一系列友賽，備戰下月13日開鑼的新球季，該隊英超首仗將迎戰新特蘭。
《花絮》
「朗尼」踩場被迫除衫
利記襲吉隆坡，全城陷入瘋狂。上周四晚紅軍公開操練時，有位後生仔可能想博出位，竟然着曼聯前鋒朗尼嘅10號波衫入場（左圖）；據報佢仲對住紅軍迷嗌「Champion」，激嬲在場數萬名紅軍迷，狂噓兼逼佢除衫（中圖）。最後呢位仁兄只好當眾除衫，赤裸上身（右圖），成個過程俾人拍低兼喺網上瘋傳，真是瘀爆。
地道炒貴刁抵到爛
國家大球場外猶如市集，有數十個檔攤，售賣比賽紀念品當然是「例牌」，最特別是有得「柯打」即叫即煮的地道菜式炒貴刁，香噴噴鑊氣十足（圖），每碟只售5元馬幣（約13港元），抵到爛！
平價畫面薄利多銷
馬來西亞人對足球的投入程度爆燈，紛紛在入場前畫花面（圖），每次都只不過盛惠5元馬幣（約13港元）；檔主話定價咁低，無非係想薄利多銷，還表示生意比之前阿仙奴那一場好。
搞掂達寧買埋杜尼
紅軍領隊杜格利殊急急腳返英，噚晚同阿士東維拉左翼達寧（圖）傾掂細節後正式加盟，周薪達8萬鎊；而球會增兵大計並未完結，之後又宣佈效力意甲羅馬嘅31歲巴西籍門將杜尼（AlexanderDoni）落實加盟，料會擔任頭號門將連拿嘅副手。
