【惠州直擊】李泳豪慘遭楊思琦拋棄後惟有寄情事業，昨日冒着大雨在惠州表演飄移，雖然天雨增加了飄移的危險性，但卻令他的表演更見精采。情場失意的豪仔在賽場上盡顯車手英姿，昨日頻頻俾女圍之餘，還有靚女自動請纓上車陪他甩尾，甩拖豪仔即成搶手貨。談到楊思琦新歡吳帥被指欠債纍纍時，豪仔坦言擔心，並向舊愛表白說：「其實我只係想佢好。」堪稱得上是癡心情長劍。
飽受甩拖之痛的李泳豪，昨日收拾心情在惠州高性能賽車俱樂部表演甩尾，上午時分他先到場試車，由於昨日天雨路滑，豪仔擔心跑車容易失控生意外，於是頻頻與工作人員研究細節。
昨日大會舉行了一場賽事，豪仔的飄移表演乃加插其中進行。試車後，豪仔向參賽者講解賽道情況，沒料到突然有5位女粉絲飛撲上前包圍着他合照簽名，其時在場一班男士見狀亦「唔蝕底」衝上前，一時間豪仔十分吃香。
「上到車自信返晒嚟」
到下午正式表演時，雨勢更大，但豪仔自信心「返晒嚟」，雨中飄移水花四濺，看得在場近百觀眾齊聲歡呼。之後大會司儀問在場有沒有觀眾願意親嘗飄移滋味，一位長髮靚女雀躍舉手，在飄移後靚女被問到有沒有想嘔吐感覺時，長髮靚女卻高呼：「好high呀！」
豪仔接受本報訪問時，被問到心情怎樣，他淡淡然說：「冇乜特別，上到車唔會諗咁多。不過今日天氣唔好，令表演好有壓力，但上到車自信返晒嚟。」有否受感情影響心情？豪仔說：「兩樣嘢嚟，平復咗，拍完《拳王》之後兩、三個月冇練車要專注番，對呢件事唔想再回應，衷心希望佢日後日子快樂。」
「係我哋兩個人嘅事」
思琦新歡吳帥近日被揭欠債纍纍及經常借錢唔還，問會否為思琦擔心時，豪仔說：「我想畀大家一個空間先，如果佢（思琦）想傾，佢會搵我傾，呢刻我明白佢承受好大壓力，擔心係一定會o架啦！」對於父親李家鼎為自己分手事件十分勞氣，豪仔說：「其實我反而擔心我屋企人，佢哋為我傷心又為我擔心，泳漢之前出嚟為我講咗啲嘢，跟住好多人對佢評價唔好，令我好內疚好傷心。」究竟現時是否仍愛思琦？豪仔未有正面回答，只說：「其實我只係想佢好，話晒大家一齊咁多年。」現時有否跟思琦聯絡？豪仔：「我唔講。」是否仍嬲思琦？豪仔：「我唔會嬲，點會嬲？總之我希望件事快啲平息，呢件事好多人有唔同意見，我只想講，呢件係我哋兩個人嘅事，網上好多評論對我家人好唔公平，屋企人維護我、愛護我好正常，唔想大家對我家人誤解。」思琦表示要取回二人共同撫養的六頭愛犬，豪仔表示要跟思琦慢慢傾，並強調：「等佢搵我傾。」
「嚟得開心去得瀟灑」
至於護子心切的李家鼎昨日要開工未能到惠州撐豪仔，但獲悉豪仔被女圍成搶手貨時，鼎爺即說：「不嬲好多女人鍾意豪仔，呢樣似老竇後生嗰時。」鼎爺表示不停勸豪仔要放得低，他說：「我叫個仔要嚟得開心，去得瀟灑，或者呢啲係上天安排嚟考驗你，人哋未必為你唔開心。」
採訪、攝影：曾小嘉
