周秀娜師妹何佩瑜（Jeana）去年出道已被指貌似范冰冰，雖具備索樣、巨咪和長腿這些當紅的先決條件，但時機未成熟，蹉跎一年才成功發圍，風頭力壓其他o靚模。書展寫真戰未開始，Jeana已遙遙領先，她的34C不倒胸絕對要記一功。為寫真造勢，Jeana四圍寸嘴辣火頭，卻收埋自己底牌，英雌被問出處，竟感觸眼紅紅，訪問中，性感和感性的Jeana兩面睇，道盡自己不倒人生，她堅持未來演藝之路只許成功，不許失敗。 撰文：比華利
今夏o靚模戰提早爆發，22歲的何佩瑜挾周秀娜師妹之名兼新8模餘勢成功彈出，她單飛的寫真更熱勢登場搶劫宅男荷包，Jeana無論擺出甚麼姿勢，34C堅挺咪咪永遠屹立不倒。為退強敵，Jeana不惜孭着成身炸藥辣火頭，多番寸爆周秀娜，顯見她的強女本色不可欺。來自北京的Jeana日前接受訪問，道盡童年來港當新移民的辛酸，提到家人更頓時眼濕濕。
北京來港誓改鄉音
Jeana在8歲時與媽咪從北京來港與爸爸團聚，家人為讓她適應，母女早於半年前先到深圳生活，初來埗到，Jeana即留下不快陰影，她回憶說：「第一日落嚟，我哋一家搭雙層巴士，我好大鄉里上樓上，然後興奮又開又閂啲窗，點知有個阿姨係咁鬧我，平時唔會鬧人嘅阿爸就幫口鬧番佢出氣。回想呢件事令我好唔開心，我好奇怪點解一嚟到香港就俾人蝦，對香港印象好差。」
童年的Jeana上學為怕被歧視，一直向同學隱瞞「我來自北京」的身份，她說：「我要徹徹底底忘記自己係北京人。」為了融入生活，Jeana苦學廣東話甩鄉音，現在成功變身港女，入行做模特兒後，她又發覺港女太平凡，反而樂於承認自己是祖國貨，她說：「可能我有北京人特質，生得高高瘦瘦，去試鏡為咗突出啲，我會自豪承認係北京人。」
中四輟學投身金融
Jeana的童年不富裕，曾住土瓜灣去年發生倒塌事故的唐樓，全家經濟支柱落在任職中港運輸公司的打工仔父親身上。三口在港團聚不久，Jeana胞弟便出生，父親擔子更重，自問不是讀書材料的Jeana，為逃避會考，中四即輟學投身金融界，企圖搵快錢養家，她說：「我做咗幾個月就唔鍾意，成日要出去應酬。」
打工打唔長，恃靚Jeana大發明星夢，輾轉當上兼職模特兒，收入不固定，仍賴家人接濟，她內疚說：「有一日我頂唔住踎喺馬路喪喊，我討厭自己渾渾噩噩，想考空姐又唔夠學歷。」機緣巧合下，Jeana去年獲選加入新8模，人生終有轉捩點。
偏偏新8模中卻殺出模媽Mia搶風頭，Jeana不甘淪為佈景板，她說：「每次出席活動，我都輪唔到做主角，我見到師姐（周秀娜）次次出嚟都好靚，身邊好多人圍住，就算新8模都冇人叫得出我個名，我好想人哋淨係叫得出我Jeana，於是我主動同經理人溝通，好想自己單飛出寫真。」訴求獲公司接納，Jeana決定豁出去：「我好怕半紅不黑，我決定乜都唔理，恃住一股儍勁向前衝，我有嘅係青春。」
超娜姐做冰冰第二
不過，強女Jeana也有死穴，當提到家人默默支持，她即熱淚盈眶：「舊年我賺錢唔多，但都花8萬買咗隻勞力士送畀阿爸，我又買咗飾物畀媽咪同親友，總數都使咗成12萬，清晒戶口嘅積蓄，一啲都唔肉痛。」Jeana今年會搏命銀，卻並非買豪宅與家人同住，她說：「我先唔做嗰啲八十後，為買層樓綁成世咁笨，我只想賺夠錢請晒親友去泰國旅行。」
論條件和人氣，Jeana已穩坐女神寶座，這支強心針令她不屑演藝成績只超越周秀娜，她說：「我嘅目標係范冰冰，記得佢當年喺《還珠格格》只係做丫環金鎖，知名度不及格格林心如，但今日林心如去咗邊？佢（范冰冰）真係好叻。」
那麼Jeana會否用天賦本錢走捷徑？她先口硬堅持三點不露。當聽到記者取笑她三點只供男友私有化，Jeana卻動搖說：「如果遇到好劇本同對手，好似湯唯拍《色，戒》咁，拍檔係梁朝偉，Ican'tsayno。」她還謂對手最好是阿諾舒華辛力加（ArnoldSchwarzenegger）。
髮型：DanielofChin.G
化妝：Meegan
寸盡Hidy、趙碩之
Jeana前晚到文化中心睇話劇，但她遲足一個鐘才到場。近日她辣着不少火頭，更被同門o靚模余曉彤（Hidy）寸她是變形金剛，Jeana笑說：「我諗佢係讚我，家《變》片咁hit，其實佢未見過我，冇資格話我。」
提到Hidy笑言要帶Jeana去潛水看她爆波，Jeana對此謂不擔心，對於惹火頭，她說：「我本身係火頭，唔想着咪唔好行埋嚟囉。我唔會收斂，我講嘢一向咁率直。」趙碩之也出言批評Jeana，Jeana則笑說：「我讚佢似莎朗史東，點知佢都係鍾意趙碩胸啫。」
「我一撻即着」
Jeana裙下之臣不少，她說：「我拍過幾次拖，最長拍咗4年，最短幾個月，但家單身。」問Jeana有甚麼擇偶條件？她說：「要高大，唔可以矮。」那王祖藍必不入選？她口快快說：「可以係朋友嘅。」她自爆冧陳豪這類高大型男，那肥仔型導演錢國偉豈非沒機會？Jeana說：「我鍾意男仔有肉地，但佢唔夠高。」
醉上舊愛家
當然家底厚最理想，Jeana說：「有錢當然最好。」她又自爆愛得癡纏：「我鍾意人哋慢慢了解我，熟絡後我一撻就着。我試過同男友見少一分鐘都唔得，我搭的士出街，啱啱上車已經好掛住喺屋企嘅男友，我咪叫的士司機原車駛返去。」
原來Jeana更是千杯不醉，訪問當晚，她甫到先灌半杯冰酒，邊飲紅酒邊做訪問，最後索性把餘下半支酒一飲而盡。她直認酒量是日積月累：「我中三就買咗支酒匿喺房飲，阿爸冇鬧，仲話女仔學飲酒冇蝕底。」然而她也有醉爆前科：「我19歲時失戀，飲酒飲天光，我醉住去男友屋企，好彩佢仲肯照顧我，但醒番就覺得自己好儍。」
後記：最憎叫賤娜
Jeana未紅前的英文名叫Pooh，冇錯，就是卡通人物小熊維尼（WinniethePooh）的暱稱，她入行後卻嫌太娘，馬上改名叫Jeana。近日為谷寫真寸爆全場的Jeana，卻反被揶揄變「賤娜」。對於被貶做賤娜，Jeana嬲爆扁嘴說：「咁衰，咁叫我好hurt，好冇禮貌，我又同佢三唔識七，就算英文唔好，可以叫我『煎娜』，係煎到皮薄餡靚嘅煎娜。」
