豪琦鬧劇連日上演，孭重飛嘅狠琦、頹豪、唔帥、癡漢、鬼眼兩幫人互數，惟獨鼎爺喪插思琦粗口橫飛，越鬧越開心，反而有fans支持。鼎爺霸氣非一天儲滿，由佢當初做龍虎武師，至娶施明生孖仔，到騎馬贏國際獎項，威水史的確一籮籮，唔怪得講句「黐X線」都大聲過人。 撰文：辰秀
⊕白襪勁chok
咪以為鼎爺惡死能登，其實平日都有風趣一面，你睇佢背心牛仔褲白襪仔加一雙運動鞋，直情係第一代板仔打扮啦，仲要chok個港女2式，高登仔，又有潛力圖喇！問佢仲玩唔玩滑板？佢噚日話：「仲玩？撻一撻條腰唔掂o架！」
《剛陽霸氣》
⊕鋼條武師
鼎爺讀書唔多，18歲拜師習武，20歲做埋龍虎武師，練得一身健碩肌肉，港男唔該行埋一邊。之後佢做無綫武術指導，不過聽聞佢設計嘅動作就一般喇！
⊕策馬硬漢
講到鼎爺最霸氣一面，梗係騎馬啦！佢一生參加過多個國際騎術大賽，贏過超過200個獎項。啲老外話鼎爺死唔服輸，仲封佢為「CrazySteve」㖭。
⊕傳授騎術
講到馬術最叻嘅藝人，非鼎爺莫屬，佢順理成章開班教藝人騎馬，好似陳慧琳（左）就係佢嘅得意弟子。
⊕摑尚格雲頓
家陣人人以荷李活巨星自居，其實鼎爺88年已經喺西片《搏擊之王》（Kickboxer）亮相，扮演泰國黑幫大佬嘅佢，仲兜口兜面掌摑大隻佬尚格雲頓，幾有霸氣呀！鼎爺噚日話：「尚格雲頓嗰陣仲係個細路，我教過佢嘢㖭！」
《鐵漢有情》
⊕四哥替身
鼎爺後生嗰陣都眉清目秀，成個小生咁款。唔講大家或者唔知，佢以前係做四哥謝賢嘅替身，大家都鍾意着白色老西，爭在冇咁chok囉！
⊕英雄救美
鼎爺73年拍《大除害》認識施明，有傳當時施明俾幾個龍虎武師抽水，鼎爺怒髮衝冠同班武師打起上嚟，結果贏得芳心，77年步入教堂。呢張相應該係鼎爺第一張一家四口嘅全家福。
⊕火爆離婚
鼎爺同施明結婚頭幾年都好恩愛，係圈中模範夫妻，不過後來有傳鼎爺牛精火爆，89年已經亮起紅燈，最後拖到94年先正式離婚。
⊕父子拍檔
鼎爺同施明離婚後，兩個仔跟阿媽移居美國，直至泳豪加入娛樂圈，兩父子關係更加融洽，仲一齊潮玩iPad。佢哋兩個最近仲合作拍攝《拳王》，上陣不離父子兵。
