【本報訊】「家人同佢失去聯絡，唔知係生係死，我都唔敢相信有生之年可以見番個仔！」78歲的王榮生，從《蘋果》記者口中得知患有精神病的六兒國柱在內地流浪3年後，在佛山被尋回，激動得不能言語，百感交集。王伯想親到佛山接回兒子，但其他子女怕他操勞阻止，並代父北上，日內將國柱帶返港治理。
旅遊失竊一直流浪
這宗離奇流落異鄉案的主角王國柱（43歲），於2008年6月從香港到湖南衡山旅遊。他報稱登山時銀包被偷，旅費及回鄉證全被盜走。王患有精神病多年，遇竊後不知何故沒有向香港家人求助。之後，他就一直到處流浪，瞓馬路，沿街行乞，由湖南到廣東，走過廣州、肇慶，佛山等地，被發現時衣衫襤褸，骯髒不堪。
王伯透露，國柱在8兄弟姊妹中排第六，讀至中三時輟學，「佢喺外邊識咗壞朋友被帶壞，又染上唔好習慣。」國柱一直無固定工作，只做散工雜務，曾經因賣紅油、偷竊等被判監，「家姐使咗好多錢幫佢打官司，但佢仍然唔生性」。王伯稱，10多年前國柱懷疑因為吸毒而患上精神病，要入住院舍及定期覆診。
國柱原與家人居葵涌安蔭邨，5年前他突然提出要分戶，獨自搬出並申領綜援過活，「只知佢搬到深水埗區，我攞嘢畀佢都係約喺街等，佢只係靠電話同家人聯絡」。約3年多前，家人發現其電話打不通，其後再沒法聯絡上，「佢係生係死都無人知，我都想搵佢，但唔知去邊度搵。」王伯承認國柱不長進，令家人失望，但血濃於水，那份思念像一塊大石般壓在其心頭。
今年5月31日佛山民警在街上發現乞丐裝束的王某，見他胡言亂語似有精神問題，立即送至救助站再轉送醫院治理。經檢查後證實王患有精神病，經治理後病情好轉，能講出自己是香港人，流浪經過，以及香港家人的電話號碼，又聲稱很掛念家人，想返回香港等。
父獲訊息十分激動
當地部門其後聯絡香港駐粵辦協助，駐粵辦證實王國柱港人身份，但王提供的香港電話未能找到其家人。《蘋果》記者從內地傳媒獲知王報稱家人住安蔭邨，前晚上門查問，王伯應門獲知兒子尚在人間，流落佛山消息後，表現激動，更表示要親自到內地接回兒子。其他子女怕他舟車勞頓阻止，國柱一名弟弟日內會到內地接他返港。據悉，駐粵辦昨日已聯絡到王的家人，並會盡快協助他返港診治，並由社署社工跟進等。