【香港先生選舉2011今晚舉行】高登神獸卡在網上張牙舞爪，隨手拈來的「縮縮北行鳥」和「小學雞」等，要非引經據典就是有圖有古，抵死啜核又吹佢唔脹，令網民笑爆嘴。今回神獸成形破卡而出，幻變香港先生四神獸。昨日11位無綫候選港男首度以泳褲look綵排，為今晚決賽預戰，四神獸中的「橫毛蝦」3號黃建東和「毛毛蟲」11號歐陽德，均以超濃體毛嚇街坊；「肥油蟹」2號許鴻達與「失控虎」12號林志勇，則以騎呢怪甫搶眼球。
無綫主辦的《2011香港先生選舉》今晚在將軍澳電視廣播城舉行，大會首次邀請男嘉賓加入評判行列，並選出香港先生、最佳台型大獎、最具演藝潛能大獎和網民投票的iMR大獎。昨日11位候選港男穿上三角泳褲，於電視廣播城進行總綵排，率先鬥肌鬥man鬥騎呢。
今屆港男質素麻麻，全部都是楊思琦男友——吳帥（唔帥）。昨日所見20歲的6號方世杰和18歲的8號鄧嘉傑，不約而同操出六嚿腹肌，整體表現已算企理；演藝一團火唔會熄的《3D肉蒲團》大茄1號蕭家浩，體形太瘦蜢蜢，驟眼看無厘神氣，遠不及港男四神獸出位。
失控虎變甩毛虎
四神獸中的橫毛蝦3號黃建東和毛毛蟲11號歐陽德，兩人茂盛濃密的臍毛及陰毛氾濫，非常嚇人。黃建東的褲頭擠出一堆一字形態的陰毛，有礙觀瞻；歐陽德更誇張，其臍毛圍住肚臍打圈，再延伸到下體，十分「黑仔」。另外兩神獸則以怪招取勝，肥油蟹2號許鴻達變擺甫王，竟然扮o靚模以雙臂巨拑夾出事業線，肥底的他又擺出大隻佬甫士，令在場人士笑破肚皮；至於報稱救生員的失控虎12號林志勇冇毛上陣，在台上狂谷肌肉。
林志勇除了頭髮外，全身零毛髮，但他否認剃毛：「我啲手腳不嬲都冇乜毛，應該有嘅地方都有，我只係剃咗腋毛。」自信爆燈的林志勇在網上狂貼半裸相騷肌肉，他直認信心十足，還說：「我係擺咗啲相上去，太過暴露啲相唔會擺，我所有相都見得人，絕對唔會影啲親密同暴露相。」
肥油蟹自信擺甫
林志勇光脫脫，橫毛蝦黃建東剛巧相反，下半身毛蹤處處，他褲頭走出的一字形陰毛份量，比眼眉還要多，對此他尷尬地說：「咁誇張？我之前都有諗過，但係我怕冇晒唔夠man，可能我後面（臀部）比較多肉，所以條泳褲要包住後面咪變成咁樣，我會多加注意。」他續說：「我之前都有問過屋企人，睇吓好唔好剃晒佢，我媽咪話咁咪好似女仔囉？聽完你哋咁講，為咗令大家睇得舒服，我會去處理。」
全場最重、體重達187磅的肥油蟹許鴻達也甚具自信，揚言信心一定有：「不過我會以平常心面對，順利喺英國畢業係我嘅大目標，比賽係細目標，我會好享受比賽。」提到在網上晒半裸相，他說：「我有朋友同我講，但係啲相只係畀朋友去睇，我下次會小心啲。」問他為何突然變甫士王？他則說：「唔知點解呢幾日唔緊張，心態好好，我諗比賽更加會放鬆啲。」
採訪：何慧斯 攝影：陳俊強
《港男神獸系列 MisterHKMonsters》
橫毛蝦HorizontalHairShrimp
3號黃建東
橫毛蝦看似毛蝦，分別在於疑受不明病毒感染，面部起摺唔襟老，恥毛更向橫延伸。由於先天缺陷，橫毛蝦習慣轉移視線，如擺出奇怪甫士扮正常。
惹笑度+167 暴露度+777 憤怒度+169
滿分1000
肥油蟹FatOilyCrab
2號許鴻達
農曆5月至8月是肥油蟹季節，肥油蟹的蟹膏味濃，偏重口味。要煮出完美肥油蟹，應以冰水浸蟹至昏迷狀態，此蟹遇冷即縮，會緊收雙拑，胸腹咇出肥油。
惹笑度+999 暴露度+776 憤怒度+167
滿分1000
毛毛蟲HairHairWorm
11號歐陽德
毛毛蟲多於香港先生中出現。毛蟲破卵而出，經過多次蛻皮及結蛹後，終極破繭成為成蟲，蟲身長滿濃毛，尤以腹部至下肢為甚，黑氣滔天，但格鬥必敗。
惹笑度+757 暴露度+999 憤怒度+799
滿分1000
失控虎LostControlTiger
12號林志勇
失控虎棲息於志勇森林，他表面上個性溫馴，但遇到強光如鎂光燈，即會四肢失控，狂呼「金翅失控鳥」，歇斯底里耍出七七四十九套七傷拳來，狀甚兇狠。
惹笑度+968 暴露度+555 憤怒度+620
滿分1000
