【本報訊】星夜下一場無情火，燒毀黎學文的幸福家庭。文叔月入不多，與身懷女兒的愛妻，以及兩名年幼兒子，居馬頭圍道百餘呎劏房。一月前唐樓三級火，為10年記憶烙下悲傷句號。醒來家破人亡，文叔自比如遊魂野鬼，但未忘昨日設靈之際，留下給最愛的說話，「老婆我今生愛你」，「希望兒子來生再當我兒」。
記者：何偉畧、梁曙光、張軍
「老婆同個仔死得咁慘，我01年識太太，辛苦10年先建立一頭家」。55歲的文叔一直顯得堅強，「父母過世都未喊」，安坐下來提起家人，淚水突然爆發，「將所有希望放晒喺啲仔身上，諗住有個開心快樂家庭，突然間冇晒，好心痛」。
生活平淡有妻兒心足
文叔的好生活，源自10年前中秋相會。他憶述經兄長介紹，認識在深圳當售貨員的太太黃建環（37歲），「第一次見面咁啱中秋加國慶休息，佢紮馬尾，個人幾好。」相識數月、拍拖數月，兩人在深圳「閃婚」，黃03年起持雙程證穿梭深港，與他於紅磡同居，05年便誕下長子俊顯（6歲）。兩年後，黃如願取得單程證來港定居。
事發前9個月，文叔為方便上下班，搬到馬頭圍道113號4樓。他從事廚具燒焊工作，月入8千餘元，生活平淡，有妻有兒萬事足，「放工返去仲要幫手煮飯，教細路做功課，有時好攰，每日返到去最想見到兩個仔」。
文叔坦言兩公婆時有拗撬，「為教仔為錢銀，唔講嘢一兩日一定好番。佢心地好好」。火舌吞噬四口團圓樂，文叔說上月15日大火那夜，他逃出家門後想起電掣未關，折返室內後便被濃煙嗆倒昏迷，與家人陰陽永訣，「係天意，命中注定，但係點解一攞就攞晒四個」。
昨午文叔一身素服，與親友到富山公眾殮房領回妻兒遺體。他步履平穩，冒着毛毛細雨，手執大香送別至親。親人擔憂他崩潰，一度拒絕讓他親睹妻兒妝前遺容，惟文叔堅持進入殮房，離去時未流一滴淚，相反黎妻的三姊潸然淚下。此時天空下起傾盆大雨，伴隨文叔一家出發前往靈堂。
「一合眼就見老婆同仔」
事件至今剛好一個月，他仍在克服悲傷，「初時半夜兩三點都瞓唔着，諗到攰先瞓得着。一合眼就見到老婆同兩個仔，直至做過法事之後就冇再見到」。火災中文叔燒傷背和腿，幸不嚴重，「過多3至5個月就可以返工，老闆話隨時開聲，畀我返去做」。重新工作指日可待，重組家庭則視乎緣份，「但就算找到另一頭家，心中依然有太太同兩個仔」。
至親軀體長埋黃土，生前一切永留文叔心中，他透露殮房再見妻兒遺體，跟太太說「今生都會愛佢，希望佢快啲投胎，遇到好人家」，更希望與兩兒再續未了緣，「俊顯你係少少頑皮唔聽話，但係我相信你同細佬都會係有用嘅人。閻羅王畀你哋快啲投胎，再做我個仔」。
「615馬頭圍道火災專戶」捐款編號：S0026
網上捐款： http://charity.appledaily.com.hk/donate